كترالضرب بيعلم القوة
بقلم/ هبة الله يوسف محمود سند
كاتبة وفنانة تشكيلية
قالوا زمان إن
قال يعنى دمعك
ده اللي هيولد القوة
ربطوا الشجاعة
بالكسرة و الخذلان
من إمتى خلقت
دمعتك قوة
ده الجرح كيف البحر
بينزل عـلى الجراح
ويكويها بلا رحمة
ويحولك يا بحر لصخر
أقسى وأقوى م الأيام
والروح بتصرخ من الألم
يمكن تطيب
تخف تروق
يمكن إيه
ده البحر كله حيتان
فاكرين إن الوجع
هايقومك تاني
لكن الألم والوجع بيحولوك ضعيف غلبان
من إمتى خلقت
دمعتك قوة
دي روحك سجينة
الغدر ودمعتك سجان
عمر الوجع
ما هيخلق القوة
دي القوه جوه الروح
مش محتاجه إستئذان
كبير الوجع هيعلمك
تقسى
والقسوة هي
مرارة الحرمان
هحكيلكوا قصة
واحدة م الكسرة
قالو عليها إتبدلت وإتغيرت
وحقيقي ده كان
القسوة جبرتها
تحارب روحها
شافت كتير
داقت كتير خذلان
يوم ما الجراح
والكسرة طالوها
داوت جروحها بإيدها
وده حرمان
حرمان يقسي قلب
عاش عمره
بيدى كتير للكل
بلا حسبان
يوم مالقلوب تقسى
ده مش نهاية الكون
بكره جراحها تلم
كيف ماتكون
بس الجراح
فى الجسم ها تعلم
لكن الألم ها يروح
مع الأيام
الضربه اللي
مش بتموت بتقوي
جمله سمعناها
كلنا من زمان
بس مفهومها غلط
من وجهة نظري
القوة دي جوة الإنسان
في طباعه وتكوينه
وشخصيته، ملهاش
علاقة أبدًا بالغدر
والخذلان والنفوس
المريضة اللي بنتعامل
معاها كلنا في حياتنا
اليومية.
مش لازم تتضرب وتقع
علشان تقوم لو إنت من
جواك مش قادر وتمتلك
القوة علشان تقوم ، عمرك
ما هتقف على رجلك تاني
ومع كل الأسف أعرف
حالتين بشكل شخصي.
واحدة ربنا افتكرها
وراحت عند الرحيم
الأرحم على عباده من
الكل ربنا يرحمها برحمته
ماتت من الحزن والأسف
على نفسها وحياتها
صديقة طفولتي وعلى
إسمي ربنا يرحمها
ويسامحها ويغفرلها يارب
وواحدة في عز شبابها
حياتها ضاعت واتدمرت
وبقت جثة تتنفس على
سريرها لا حول لها ولا
قوة.
ربنا يعافيها ويعفو عنها
ويشفيها
وغيرهم أمثال كتير
الوجع والكسرة والخذلان
مش نهاية الكون صحيح.
وصحيح بتغير فى طباع
الإنسان بس عمرها ما
هتوجد شيء لو مش
موجود من البداية ، الغدر
والخذلان والنكران ،
أى مرار ، وألم بيمر علينا
بيقسينا
مش بيقوينا.
فترة نقاهة بعد كل جرح
مهما كان عمق الجرح .
الوقت صحيح كفيل
لإلتئام الجراح .
وحقيقي الجرح هيلم
بس لازم يسيب علامه
علامة وعلام
علامه تفكرك الدرس اللي
إتعلمته.
مش للبكاء والنواح ، بس
يعلمك للي جاي
إن إيدك اللي إتعودت
تمسح دموعك وتداوي
جراحك هي الوحيدة
اللي عمرها ما هتخذلك.
وهي الوحيدة اللي
تستحق .
لازم الجراح فى الجسم
هتعلم
بس الألم والوجع بيروح
مع الأيام.
