التعامل مع الشخصيات الصعبة بوعي
بقلم / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
عضو التحالف العربي لخبراء العلاج النفسي
عمرك حسيت إنك بتتعامل مع شخص مُرهق ومش فاهم ليه؟
كل تصرف معاه بيخليك محتار ، متلخبط ، وأحياناً شاكك في نفسك؟
الحقيقة إن مش كل شخص مرهق يبقى “صعب” وخلاص …
أحياناً بيكون وراه نمط نفسي أعمق محتاج فهم ووعي.
لكن مهم جداً نوضح نقطة أساسية
مش كل سلوك صعب معناه اضطراب في الشخصية، والتشخيص بيتم عن طريق متخصص.
إنما في أنماط سلوكية معينة بتتكرر، وبتحتاج مننا طريقة تعامل مختلفة علشان نحمي نفسنا.
وعيك هو خط الدفاع الأول
كتير من الناس بيتعاملوا مع شخصيات مرهقة من غير ما يفهموا طبيعتها وده بيخلي العلاقة مليانة لخبطة و ضغط نفسي واستنزاف.
ممكن تلاقي شخص
• يقرب منك جداً وبعدين فجأة يبعد
• يحسسك بالذنب بدون سبب واضح
• يخليك تشك في نفسك وكلامك
هنا المشكلة مش بس في الموقف… لكن في النمط.
طيب إزاي أتعامل بوعي؟ 🤔
١. افهم إن الشخص ده مش “بيختار” يكون كده
في سلوكيات كتير بتكون نتيجة تجارب قديمة أو أنماط نفسية اتكوّنت مع الوقت.
لكن ده ما يلغيش مسؤوليته عن تصرفاته.
بدل ما تسأل ليه بيعمل كده؟
اسأل ؟؟
هل السلوك ده مقصود؟ ولا نمط متكرر؟ وإزاي أحمي نفسي؟
٢. افهم الأنماط مش تشخّصها
فيه أنماط بنشوفها كتير زي
• شخص بيتعلق بسرعة وبيخاف من الهجر
• شخص بيحب يكون دايماً محور الاهتمام
• شخص ممكن يتلاعب بمشاعر غيره
• شخص بيعتمد على غيره بشكل زائد
مش دورك تشخّص…
لكن دورك تفهم النمط علشان تعرف تتعامل.
٣. حط حدود واضحة وثابتة
المرونة الزايدة بتتعبك والقسوة الزايدة بتصعّد المشاكل.
قول “لا” بهدوء من غير تبرير كتير
واحمي ..
• نفسك
• وقتك
• طاقتك
• مشاعرك
الحدود مش قسوة الحدود حماية
٤. ما تحاولش تعالجه بنفسك
حتى لو بتحبه أو شايف فيه جانب كويس أنت مش المعالج بتاعه.
ممكن تدعمه أو تنصحه لكن مش مسؤوليتك تغيّره.
٥. راقب نفسك كويس
العلاقات المرهقة بتأثر عليك تدريجياً
اسأل نفسك ؟!
• هل أنا مرتاح؟
• هل بقيت بزعل أغلب الوقت؟
• هل بدأت أشك في نفسي؟
• هل نومي أو حالتي النفسية اتأثرت؟
لو الإجابة ” آه ” يبقى لازم تقف مع نفسك بجد.
٦. اختار البُعد لو العلاقة مؤذية
لو العلاقة بتستنزفك أو بتأذيك نفسياً أو جسدياً
يبقى البعد هنا مش ضعف ده وعي
مش كل علاقة ينفع تكمل
في علاقات الحفاظ على نفسك أهم من الحفاظ عليها.
مثال بسيط من الواقع 👇
▪️ شخص كل مرة تختلفوا يقلب الموقف ويخليك أنت الغلطان ويخليك تعتذر حتى لو أنت متأذي …
مع الوقت هتلاقي نفسك:
• بتشك في إحساسك
• بتخاف تتكلم
• وبتتنازل عن نفسك علشان “تعدّي الموقف”
ده مش خلاف عادي ده نمط محتاج حدود
أخيراً .. ❤️
التعامل مع الشخصيات المرهقة مش معناه إنك تستحمل على حساب نفسك ولا إنك تحكم عليهم بقسوة.
المهم إنك
• تفهم
• تحط حدود
• وتعرف إمتى تساعد وإمتى تبعد
مش كل علاقة ينفع تتحافظ عليها بس كل مرة بتحافظ فيها على نفسك أنت بتتعافى ✨♥️✨
