متلازمة التعب المزمن
بقلم / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
عضو التحالف العربي لخبراء العلاج النفسي
في ستات (ورجالة كمان) بتصحى من النوم تحس إنها لسه ما نامتش.
تقوم من السرير كأنها كانت في خناقة مش نايمة
مش علشان سهرت ولا علشان بذلت مجهود تقيل !!
لاء ده إحساس أعمق من كده بكتير.
كأن الطاقة كلها اتسحبت منك من غير استئذان
تنزل مشوار بسيط او تخلص مصلحة تحس إن جسمك انهار فجأة…
▪️وجع في العضلات
▪️صداع
▪️دماغ تقيلة
▪️تركيز صفر
وغالبا تبدأ تسمع نصايح جاهزة زى …
🔸إنتى محتاجة تنامي أكتر
🔸ده إرهاق عادي
🔸أكيد أنيميا
بس الحقيقة ده تعب من نوع مختلف…
تعب ما بيروحش بالراحة وبيظهر أكتر بعد المجهود ويخلّي صاحبه دايماً حاسس إنه متهم بالكسل قدّام نفسه
التعب ده اسمه ( متلازمة التعب المزمن )
وحكايته مش بس حكاية جسم دي حكاية ناس عايشة بتجاهد وبتدفع تمن إنها حاولت تبقى طبيعية.
يعني إيه متلازمة التعب المزمن؟
ببساطة شديدة
هو تعب ( مستمر ، عميق ، ومش بيتحسن بالراحة) وبيسوء بعد أي مجهود حتى لو بسيط
اللي عنده المتلازمة دي
ممكن يعمل مجهود عادي جدًا
بس يدفع تمنه بعدها على طول
تلاقيه خلّص اللي وراه
وبعدين فجأة يقع 💔
وده الفرق الأساسي بينها وبين التعب العادي 🖤
طيب نميّزها إزاي عن حاجات شبهها؟
🔺الأنيميا .. بتخلي النفس قصير والوش باهت
🔺نقص فيتامين د .. يوجع العضم ويقلّب المزاج.
🔺الاكتئاب .. يخليك فاقد الشغف ومش عايز تقوم من مكانك.
🔹لكن التعب المزمن بيسيبك تقوم وتتحرك وبعدين يعاقبك بعدها.
يعني تقدري تشتغلي و تخرجي و تتحملي …
بس بعدها تيجي أيام تحسى فيها ان جسمك واجعك كأنك داخلة على دور إنفلونزا تقيل 😪
المشكلة الحقيقية فين؟
إن ناس كتير بتجلد نفسها.
تفتكر إن اللي فيها ضعف أو كسل أو دلع
وتبدأ تضغط على نفسها أكتر
علشان تثبت إنها قوية.
بس الضغط هنا مش حل…
الضغط هو البنزين اللي بيولّع النار 🔥
متلازمة التعب المزمن مش ضعف شخصية ومش وهم ومش قلة إرادة 😔
▪️دي حالة جسدية ونفسية معقّدة بتتأثر بالجهاز العصبي والمناعة والضغط النفسي ونمط الحياة.
طب نعمل إيه؟
مفيش حل سحري
بس في إدارة ذكية… وقواعد مهمة 💛
🔹 أول قاعدة .. وفّري طاقتك
لو حاسة إن طاقتك ١٠٠%
استخدمي ٥٠ % بس.
سيبي دايماً حتة فاضية
علشان جسمك ما يقعش فجأة.
🔹تاني قاعدة .. نص المجهود
لو تقدري تعملي الحاجة وإنتي قاعدة اقعدي.
لو تقدري تقسّمي المشوار على يومين، اعملي كده.
القوة مش في تكسير النفس
القوة في الحفاظ عليها.
🔹تالت قاعدة .. النوم علاج مش رفاهية.
افصلي الموبايل قبل النوم بساعة
هدي الإضاءة وادي لجسمك إشارة إنه مسموحله يرتاح.
🔹رابع قاعدة .. الضغط النفسي سارق طاقة
اتعلمي تقولي «لاء»
مش كل طلب لازم يتلبّي
ولا كل مشوار ضروري
ولا كل حد لازم يرضى.
أخيراً …
لو دايماً حاسة بالتعب وحاسة إنك أقل من غيرك
أحب أقولك
🔸انتي مش ضعيفة
🔸وتعبك حقيقي
🔸وجسمك مش عدوك ده بيحاول يحميك.
اسمعيله بدل ما تحاربيه واديه حنية بدل جلد ذات.
الراحة مش كسل .. الراحة أحياناً هي الشجاعة بعينها ♥️
