المقال الثالث من سلسلة في بيتنا مراهق
بقلم / سمر جرجس مرقص
أخصائية إرشاد نفسي وأسري وزواجي وتعديل سلوك
عضو اتحاد المعالجين النفسيين العرب
المراهق مش أصم هو موجوع
— أنا بكلمك ومفيش فايدة!
— مش لازم أسمعك إنتِ عمرك ما سمعتيني!
كانت واقفة في نص الصالة والغضب مالي صوتها
وكان هو واقف قدامها ساكت بس جواه بركان.
مش لأنه مش سامعها لكن لأنه اتعلّم إن الكلام معاها مش هيوصل.
هي شايفة إنه عنيد.
وهو شايف إنها مش بتفهمه.
هي بتحاول تربيه.
وهو بيحاول يلاقي مساحة يتنفس فيها.
النتيجة؟ جدار صامت بين اتنين كانوا يوما قريبين جداً.
في مرحلة المراهقة المراهق مش بيقفل ودانه هو بيقفل قلبه لما يحس إنك مش بتسمعيه.
في اللحظة اللي بتقولي فيها أنا أمك وأعرف مصلحتك
هو من جواه بيصرخ انتى مش سامعاني
والصراخ الصامت ده هو اللي بيعمل المسافة بينكم.
الاستماع مش رفاهية الاستماع حياة.
مشهد بسيط زي ده بيتكرر يوميا في آلاف البيوت
الأهل بيتكلموا والمراهق بيسكت.
لكن الصمت ده مش راحة ده صرخة مش مسموعة.
لو كل نقاش بيتحوّل لمحكمة المراهق هيدور على قاضي تاني 😒
وافتكري القاضي ده ممكن يكون صاحبه ، أو السوشيال ميديا ، أو أي مصدر بره بيتك.
لكنك تملكي مفتاح ما حدش يقدر يقدمه غيرك
مفتاحك ( أُذن بتسمع وقلب يحتضن) 🗝️🗝️
ليه الاستماع مهم؟
١ – لأن المراهق في السن ده مش بيدوّر على أوامر بيدوّر على مساحة.
٢ – مش عايز نصيحة جاهزة عايز إحساس إنه مهم.
٣ – لما بيسمع من غير ما يتسمع بيحس إنه وحيد.
٤ – لما تِسمعيه بجد بيحس إنه آمن.
الاستماع مش ضعف الاستماع قوة
* قوة إنك تحتضنيه بكلمة ساكتة، بنظرة هادية، بابتسامة مطمئنة.
* قوة إنك تكسبي ثقته من غير معركة.
* قوة إنك تكوني ( الملجأ ) مش ( الخصم ) 👌
لو عايزاة يسمعك اسمعيه
١- ما تقاطعيش كلامه حتى لو مش عاجبك.
٢- ما تكسريش مشاعره بجملة بسيطة زي كفاية دراما.
٣- ما تبدأيش نصيحة قبل ما يخلص هو كلامه.
٤ – اسمحي له يغلط وهو حاسس بالأمان.
٥ – لما يخلص كلامه اختاري كلماتك بعناية مش علشان تكسبيه لكن علشان تحتويه.
رسالة لكل أم وأب 💌
أول مرة هيسمعك فيها ابنك المراهق مش لما ترفع صوتك ولا لما تكرر نفس النصيحة ، ولا لما تعنّفه
هيسمعك لما يحس إنك سمعته قبل ما تتكلم و تنصح
لو لقى عندك حضن وأُذن مش هيدوّر على العالم برا.
لأنك وقتها مش بس بتربيه إنتِ بتبني علاقة عمر.
أخيراً..
صوتك مش هو اللي هيغير ابنك استماعك ليه هو اللي هيقربه منك
في يوم من الأيام ابنك مش هيفتكر كل النصايح اللي قولتيها
لكن هيفتكر حضنك 🫂
صوتك الهادي 🗣️
وأُذنك اللي كانت بتسمعه 👂
القلوب ما بتتغيرش بالصوت العالي القلوب بتتفتح بالحب والاحتواء ✨
لو سمعته النهارده هيسمعك طول العمر 💛💛
