حوار صحفي مع المهندسة “ولاء فرغلي” الملقبه بطبيبة السيارات
أجرى الحوار : محمد صبري المهر
ولاء فرغلي بنت محافظة القاهرة عمرها 31 عاماً تخرجت من كلية الهندسة المطرية جامعة حلوان قسم ميكانيكا السيارات، وبعد تخرجها عملت بأحد مراكز صيانة السيارات، واجهت العديد من المصاعب والعوائق خصوصاً أن هذه المهنة معروفة في مجتمعنا بأنها مهنة رجال، إلا أنها لم تيأس وأصرت أن تُثبت أنها جديرة بهذا العمل، وأثبتت بالفعل أنها جديرة بهذا العمل، وأطلق عليها لقب “طبيبة السيارات، لذلك سعينا للحوار معها.
في البداية سألناها :-
– كيف كانت بدايتك ؟
– بدايتى كانت فى 2017 لما اتخرجت من هندسة المطرية جامعة حلوان قسم ميكانيكا سيارات ، بعدها اشتغلت فى أكتر من مركز خدمة مهندس ورشة وطبعا كانت طبيعى شغلى أكتر احتكاك بالفنيين وبالعربيات.
– لماذا أخترتي مجال الميكانيكيا على الرغم من أنها معروفة في مجتمعنا أنها مهنه خاصه بالرجال ؟
– الحقيقة هى كانت صدفة دخولى قسم هندسة سيارات خاصة أنى اشتغلت فى المجال ده فى الورشة وتشخيص الأعطال وممكن مجتمعنا يعتبر إن دى مهنة خاصة بالرجال فقط نظراً لصعوبتها.
– ما هي الصعوبات التي واجهتك في بداية عملك بمجال صيانة السيارات ؟
– من أكتر الصعوبات اللى واجهتنى هو التعامل مع الفنيين وتقبلهم فكرة إن مديرهم يكون مهندس وبنت وبالتالى واجهت صعوبة فى الشغل نفسه نظراً لعدم تنفيذهم للتعليمات الخاصة بالعمل بسهولة وبالتالى إعتمادى على نفسى فى التشخيص والتعامل وإقناعهم بصعوبة إنى جديرة بالشغل ده.
– إزاي قدرتي تتخطي الصعوبات التي واجهتك ؟
– قدرت أتخطاها بالصبر والإرادة ورغبتى إنى أثبت نفسى فى سوق العمل فى مجال معظم العاملين فيه رجال.
– ما هي مقومات مهندس الصيانة الناجح ؟
– الذكاء الإجتماعى وكاريزما الشخصية اللى بتساعد على تخطى المواقف الصعبة مع فريق العمل، وقوة الشخصية اللى تقدر من خلالها تكون شخص عنده ثبات إنفعالى فى أى موقف، وكمان الثقة فى النفس اللى بتساعدك تطور من نفسك وتثق فى قراراتك فى الورشة، وطبعا الإجتهاد والمثابرة على كل المواقف الصعبة.
– هل في يوم حد قال ليكي ده مش مجالك وإنتي هتفشلي ولو ده حصل إتعاملتي مع الموقف ده إزاي ؟
– كتير قالولى كده والحقيقة أكترهم رجالة، وتعاملي مع المواقف اللي زي دي كانت عن طريق إني تجاهلت الكلام لأني عندي مبدأ إسمه تجنب المحبطين لأنهم بيأثرو على أى شخص ناجح تأثير كبير.
– من هو أهم داعم ليكي ؟
– أول وأخر وأكبر الداعمين ليا هما أفراد أسرتي.
– من هو قدوتك أو مثلك الأعلي في مجالك ؟
– أى شخص ناجح ومجتهد فى مجال السيارات هو قدوة ومثل أعلي ليا.
– ما هي أمنيتك اللي بتحاولي تحقيقها في حياتك ؟
– يبقى عندى مشروعى الخاص بيا وبالتحديد مركز خدمة فيه جزء مخصص لتعليم الفتيات مهنة السيارات.
– ما أهمية ما تقدمية للمجتمع ؟
– النماذج الناجحه دايماً بتبقى قدوة لأى شخص ظروفه صعبة أنه ينجح ويحقق حلمه.
– هل تقبلي النقد على عملك بمجالك ؟
– بقبل النقد فى أى شئ يخص مجال لأنى لو مش هقبل النقد مش هتعلم أى شئ جديد وبالتالى مش هتطور ولا هحقق أى إنجازات.
– حدثينا عن خططك المستقبليه ؟
– خططى المستقبلية بخصوص المجال حابة أقدم كورسات بشكل بسيط لتعليم ميكانيكا السيارات.
– المهندسة ولاء فرغلي كلمة أخيرة لجريدة مصر اليوم ؟
– بشكر جريدة مصر اليوم لتقديمها دايما النماذج الناجحه لتحفيز الشباب على إقتحام المجالات الصعبة.
