قصيدة بعنوان
رمضان زمان
بقلم حسام نشأت محمد
وانا ماشي في الشارع سرحان
والزينه حواليا في كل مكان
فوانيس وكنافه وقطايف
ومكسرات اشكال والوان
وعيني تبص شمال ويمين
ومسامعي بتنصت للقرآن
قابلني صديق شبهت عليه
قال لي إفتكرني انا رمضان
بصيت عليه وانا قلبي حزين
ده شكله اتغير عن زمان
انا فاكر واحنا بنستناه
قبل الأوان بألف أوان
وبنستقبل قراباته قبليه
الشيخ رجب والشيخ شعبان
كنا نعد اليوم بالثانيه
كنا نلبي كل اذان
كان ليه فرحه غير العادي
نرقص لما هلاله يبان
فرحه تبان في وشوش الناس
فرحة شوق لرضا الرحمن
فين فرحتنا بكيس الطرشي
وبفوازير نيللي وشريهان
صوت المدفع قبل المغرب
يروي قلبك يا عطشان
والتراويح ثمان ركعات
والقران روح وريحان
حتى الفول كان متدمس
عادي ،تاكله وتفضل سهران
ومسحراتي يلف يدور
قبل السحور يصحى الغفلان
ولا حد فينا يصحى كسول
من اكل الفول تفضل شبعان
قاطعني وقال لي اسمك ايه
مش فاكرني هو كمان
ولما عرف انه اسمي حسام
قال لي مش انت بتاع زمان
انت اتغيرت يا ولدي كتير
انا فاكرك وانت مع الصبيان
كنت بتفرح بالتراويح
كنت بتسمع للقران
ومر العمر في غمضه عين
حتى الشيب في شعرك بان
فين اصحابك مش حواليك
إيه اخبار فلان وفلان
سال الدمع على الخدين
والكل هيعرض على الديان
قال لي سلامتك انت بخير
فالمولى بلغك رمضان .
