القلب النضيف أقرب إلى الله
بقلم: إيهاب نجاح جنديه
جريدة الأسبوع العربي الإخبارية
مش كل اللي بيكتر صلاته أقرب، ومش كل اللي صوته عالي بالدين أو كلامه منمق يبقى سبق غيره عند ربنا. في ناس بسيطة، قلوبها نضيفة، نيتها صافية، ويمكن أعمالها قليلة في نظر البشر، لكنها كبيرة جدًا في ميزان الله.
القلب النضيف هو اللي ما يعرفش الحقد، ما يفرحش في أذى غيره، وما يستناش مقابل على الخير. قلب يشيل الوجع ويسامح، ويتغاضى وهو قادر يرد، ويختار السلام رغم إن الشر أسهل. ده قلب فاهم معنى الإيمان قبل ما يحفظ ألف آية وحديث.
ربنا لا ينظر إلى الصور ولا إلى المظاهر، بل ينظر إلى القلوب وما تحمله من صدق ورحمة ونقاء. كم من إنسان بسيط سبق غيره بدرجات، لأنه لم يظلم، ولم يؤذِ، ولم يخن أمانة، فكان صادقًا مع الله قبل أن يكون صادقًا مع الناس.والقلب النضيف مش معناه إن صاحبه ملاك، هو بيغلط ويتعب ويحزن، لكنه ما يسمحش للسواد يسكن جواه. لو أخطأ يرجع، ولو قصر يصلح، ولو وجع غيره يعتذر. ودي عبادة حقيقية، يمكن تكون أقرب إلى الله من ألف كلمة بلا روح.
والأجمل والأكمل، إن الإنسان اللي بيحافظ على قلبه نضيف، وبيؤدي فرائض ربنا في نفس الوقت، صلاة وصوم وزكاة وطاعة، يبقى جمع بين حسن النية وصحة العمل. وده أعلى مقام يوصل له عبد، لأن رضا الله لا يكون في الطيبة وحدها، ولا في العبادة الجافة، لكن في قلب سليم بيعبد ربنا بصدق.
في زمن كثرت فيه القسوة، وبقت الكراهية أسهل من الرحمة، أصبح القلب النضيف عملة نادرة. لكن الطيبة مش ضعف، والنقاء مش سذاجة، بل قوة وثبات، وحماية من الله قبل أي شيء.
القرب الحقيقي من الله مش في المظاهر، القرب الحقيقي في قلب سليم، وعبادة صادقة، وسلوك يرضي الله في السر قبل العلن.
فمبروك لكل من جمع بين نقاء القلب وطاعة الله… فقد نال رضا الله في الدنيا، وبإذن الله كرامته في الآخرة.
