كلب الجيران ..
تاليف ورسومات أ . ايمن صالح .
كلب الجيران ..عليوه بيلعب مع اصحابه ونازلين جري ولعب وشد وجذب. فجاه عليوه شاف الكلب راقد فوق جسر الارض .
وبالطوبه وفي دماغ الكلب .
قام الكلب هب وعض .
وعليوه نزل صريخ وهب ودب .
والام جريت وقعدت تلعن وتسب .
اخرتك علي ايدي كلب .
حطت سم في نص رغيف ولما الكلب شاف الاكل نط وشب .
مات الكلب .
ليه كلب العوايضه يموت .
بس الصبر موتوا كلب يبقى قصاده احسن شب .
قامت عركه وصويت ونواح ودم وضرب .
وسلاح بيدوي وعيال بتجري وحريم تصرخ وعيال بترمح والدم لون طوب الارض .
والضحايا بتاعت الحرب .
خمسه من العوايضه وعشره من التوايبه شباب منوره طول وعرض .اندفنوا يومها تحت الارض .
بس العركه لسه ما خلصت .
وقلوب مولعه لسه ما بردت .
نبابيت وسلاح وسكاكين اتبردت .
ومن يومها والبلد اتقلبت .
وكلب الجار جاب النار واصبح تار واللي ما ياخد تاره جاب العار .
الحقنا يا ود العم سيب البندر والحق اهلك .
الحقنا يا ولدي لنهلك .
من حقنا لازم نندهلك .
وجاهم استاذ محمود .
قيمه ومركز والبدله والنضاره وسبحه في ايده ووسامه وعود مشدود .
سلم عالكل وقال اومال فين سلمان وشحته وعوضين .
متقولوا يا خلق ايه الحاصل .
قالوا اتقتلوا وفي تارهم مش هنفرط واصل .
بكى محمود وقال يا اخواني سبتوني وحيد وحداني .
وانا شغال في الغربه لمين .
ما لسلمان وشحته وعوضين .
بقا يا بهايم تعملوا حرب وتقتلوا بعض علشان خاطر عضة كلب .
اما انتوا صحيح ناس مجانين ترابيس .
ووقعتوا في خطه ابليس والعيلتين بقا بينهم تار وامتي هتخلص موت يا حمار .
هتخلوني واحد تاني وخسرت يا عالم اخواني وبقيت بسببكم وحداني .
فين العقل يا ناس طرابيش ما تخلونا ناكل عيش .
سبنا بلدنا واتمدنا ونسينا احقادكم والفتنه .
انا هرجع تاني للبندر وان قلتوا دا عيل ومدلدل مش هتراجع وهروح لاشغالي ومش راجع .
هرجع لكياني وتعليمي .
هرجع لصلاتي ولديني .
وارجع لشوارعي ومياديني .
وارجع للمسجد وحياتي ولناس مشغوله بعملها ناس مفهومه وفي حالها .
ولو يوم قالوا اهلك فين .
هقولهم الله يرحم سالم وشحته وعوضين ..
