البعد بيعلم الجفا

البعد بيعلم الجفا

كتبت/وفاء فتحي 

البُعد والانقطاع عن شخص بتحبه لفترة طويلة بيبرد مشاعرك غصب عنّك ..

زمان قالوا “البعيد عن العين بعيد عن القلب”

مكنتش بقتنع أوي بالجُملة دي .. بس فهمتها مؤخرًا ..

رغم إن المشاعر ممكن تفضل موجودة ومكان الشخص جوّاك بيفضل محفوظ .. ٱلا إنه بيحفر بإيده فجوة عميقة تحيل ما بينكم ..

البُعد بيحفر جفا و قسوة .. البعد بيشق الحلم لاتنين .. والروح لاتنين .. والطريق لطريقين متوازيين مبيتلاقوش في ولا نقطة ..

البُعد سلاح الحب اللي بينزل على لهفة مشاعرك يقتلها بسكينة تِلمة وباردة ..

البُعد المقصود اللي عن عَمْد بيحوّل مشاعرك لإزاز قابل للكسر وجرح أي حد حواليك بدون قصد ..

البُعد بيخليك تفقد قدرتك على البكا .. لإنه بيستنفذ كل الدموع المهدورة في أول أيام الفراق اللي بعدها بتحس إنك خلاص .. خلصت دموعك وعيونك جفّت ..

البعد قنبلة صامتة موقوتة، بتمحي كل الحجات الحلوة اللي جواك بالتدريج ..

البعد عن حد بتحبه بيديلك كل يوم ضربة توبيخ على إنك علّقت نفسك بشخص كان في إيده يبقى معاك .. بس اختار البُعد واختار يقتل مشاعرك وانت عايش ..