كارثه خريجي دار الايتام
من الدار الي النار
الكاتب الصحفي
احمد المغربي
2024/10/2
شكاوي وصرخات خريجي دور الايتام وتحديدا قرية أطفال SOS ودي بالمناسبة جمعية لرعايه الأطفال فاقدي الاهليه حالها حال دور الايتام في كل شئ
ولكنها لها عدة فروع في دول عربيه وغربيه
ولكن هناك مشكله لاتجد لها حل سوي وجود تدخل قوي من رئيس الوزراء ووزير التضامن
تتلخص المشكله ان غالبيه خريجي الدار لايتم السماح لهم بعمل بطاقة تموين ولا يتم تسليم سكن لهم علما بأنهم طرقوا جميع الأبواب
ومع الأسف رد وزارة التضامن لهم انكم غير تابعين لوزارة التضامن
وهنا سؤال طيب انتم ليه اديتوا لهم ترخيص منذ عشرات السنين؟
والسؤال الآخر طيب ليه انتم دخلتوهم الخدمه العسكريه؟
يعني همه يؤدوا خدمه لوطن بعض موظفيه مستكثرين عليهم حق الحياه؟؟؟
ليقابلني سؤال آخر حضراتكم بترموا الولد في الشارع بعد سن ٢١ سنه لا بطاقه تموين ولاسكن طيب يعمل ايه؟
مش كفايه انه عاش في ظلم من قبل ميلاده مش لازم يموت بظلمه او نحوله لبلطجي او حرامي عشان يعرف ياكل….
وهناك بعض المبررات الاخري من قبل وزارة التضامن تدخل تحت بند عدم المساعده وهي
انك عشان الوزاره تساعدك في الزواج لازم تتجوز خريجة من الدار
وده قرار فيه بعض الصواب ولكن غالبية القرار خطأ
لأنك ان كنت عاوز توجد فرصة زواج للبنت فحضرتك بتجيب واحد بدون اهل تجوزه لبنت بدون اهل يعني أسره بدون عائل ولا سند ولا ظهير يعني عملت أسره ضعيفه جدا…
ونيجي للمصيبه الكبري الوزاره بترفض تقديم أي دعم او عمل بطاقة تموين او الحصول على شقه ان لم يكن الطفل مسجل بالدار منذ قدومه وده قرار خاطئ ومجرد هروب وهقول لحضرتك ليه
لان الطفل الرضيع اللي دخل الدار ميعرفش ان كان تم تسجيله ام لا
ثانيا معاليك بتفتش علي الدار عدة مرات كل عام وبتعمل حصر بالعدد والاسماء كنت فين طوال ٢١ سنه
خلاف ان عندك الأوراق والمستندات اللي الطفل بروح بها المدرسه وبتعالج بها وببطلع بها من دار الايتام لدار الرعايه
يعني حضرتك قعدت ٢١ سنه شغال غلط ولما جيت عشان تدي الولد اقل حقوقه افتكرت انه مكنش مسجل في سجل الاستلام
مع العلم ان اي طفل بيدخل الدار بيدخل عن طريق محضر شرطه
واقولك على مصيبه اكبر قريه الأطفال دي حاليا بها اكثر من خمسين طفل بها اثني عشر طفل فقط همه اللي مسجلين بدفتر الحضور طبقا لمعلوماتي
وبصرف النظر عن ذلك المفروض الوزاره تشكر القائمين على تلك الدار وجزاهم الله خير الجزاء انهم ساهموا في تربية أطفال كان مسيرهم الشارع
وحتي لو همه اخطأوا في حاجه فخير ما قدموه شفيعا لهم وممكن حضرتك تدارك الخطأ
الأطفال دول حاليا بقوا شباب وفيهم المتزوجين ولديهم أطفال ومازال الوضع كما هو عليه ياريت تدخل فوري وسريع من رئيس الجمهوريه لأن الوضع ده منذ سنوات والناس طرقوا كافة الأبواب وبقي الوضع كما هو عليه أمام روتين تاره وهروب من المسئوليه تارة اخري واطفال ليس لهم ذنب سوي انهم نتاج اب وام نسأل الله لهم الهداية
