في حديث صحفي مع سيد معوض لاعب الاهلي السابق
كتب :احمدعبدالنبي
قبل ما امشي من الاسماعيلي كنت وقتها قالولنا اللي عاوز يمشي يجي يكتب ورقة أنه عاوز يمشي عشان الجمهور .. انا كان عندي خلاف مع مهندس يحيى الكومي روحت قولتلهم انا عاوز امشي .. قالولي هتروح فين ؟ قولتلهم هروح الأهلي .. كان عندنا معسكر للمنتخب قبل ما اروح المعسكر روحت مضيت للأهلي قدام يحيى الكومي وخد الشيك والأهلي خد الاستغنا .. روحت المعسكر والمواقع عرفت ونشرت الدنيا اتقلبت في اسماعيلية .. الأهلي راح يختم الاستغنا من مديرية الشباب في اسماعيلية مرضيوش وقالولهم المحافظ رافض وهيمشي مجلس الإدارة أصلا احنا مش هنخلص الورق ده .. روحت لحسن شحاتة قولتله انا ماضي ورق اني عاوز اروح الأهلي والصفقة متمتش وكده لا هرجع اسماعيلية ولا هروح الأهلي هعمل ايه قالي تعالى بطولة إفريقيا ولما تخلص ابقى شوف الدنيا وقتها ربنا يكرم .. روحت بطولة إفريقيا ايمن عبد العزيز جابلي عرض في تركيا الباك بتاعهم اتصاب فأنا ما صدقت .. اسألوه زملكاوي هو اللي جابلي العرض
لما روحت بقى انا اللي كنت مصمم ارجع للأهلي بأي شكل .. الزمالك كلمني وقتها كانوا جايبين اجوجو وأيمن عبد العزيز وهاني سعيد وبيدفعوا فلوس اكتر من الأهلي .. بعتولي حد بشيك قالي اكتب اللي انت عاوزه هنديهولك .. بس انا كان حلمي وحلم ابويا الله يرحمه العب في الأهلي انا بلدي كلها أهلاوية فاتفقت مع النادي في تركيا كانوا مختلفين مع الأهلي على 250 الف دولار اتنازلت عنهم وروحت الأهلي.
