ردًا على السادة الشعراء والأخوة.في الله
رداً على الشاعر الأخ سامح هريدي الذي يريد جواباً
الشاعر/ الشاعر سامح هريدي
والشاعر / محمد المساعيدي
والشاعر/ الشاعر سيد عربى
والشاعره/ وفاء على
و الشاعرة رباب الجورية
والشاعر/ محمد طلعت
Talaat Talaat
الشاعرة /هيوم حمزة
الشاعر الشاعر الاسواني عوض سليمان. الشاعرة نادية البديوي
اشارككم في الرد علي الصديق
الشاعر/
الشاعر سامح هريدي
……….
الشاعر سامح هريدي
مش عارف مالي
ولأول مرة بحس بأني
مش قادر أعبر عن حالي
جوايا حاجات صعب أوصفها
ممكن تترجم ف الاخر علي شكل دموع
تقريبا ممكن أكون موجوع
مهموم مخنوق
محتاج أتكلم مع نفسي
أهو يمكن أفوق
محتاج أكتبني ف نص يكون
من غير عنوان
من غير مضمون
محتاج أسمعني وأطيب خاطري
محتاج دلوقتي اني أطبطب
علي روحي بجد
محتاج اني أقفل علي روحي
مش عايز أصعب علي حد
كل اللي يشوفني يقول مالك
مقدرش أرد
م أنا أصلاً مش عارف مالي
ولا عارف ليه
صبحت في عينيا أساساً سد
هو أنا بتهد ؟
لو فى تفسير للحالة ياريت
تهتموا بجد
الشاعر سامح هريدي
…………………………………
محمد المساعيدى
كل الحدوتة انك انسان
بيعافر علشان لقمة عيش
بتراعي شعور الناس بضمير
ولا عشتش عمرك
لحظة طيش
مستورة معاك والستر عظيم
ولا عمرك قولت ياخلق مافيش
فاكيد الدنيا هاتيجي عليك
وهاتقفل تاني ف وشك شيش
لكن صدقنى ياولد العم
كل اللى بياخد مابيديش
مخنوق من مين مخنوق من ايه؟
وحبايبك لسه ف ضهرك جيش
روق ياهريدي الشعر وروق
واكتب علشان الشعر يعيش…
—————————–
👇🏽
الشاعر سيد عربى
صوت المزامير والفرح وناي
مهموم جواك
مهموم جواي
صاحبك سندك ونهار الضحكة
اللي في روحك
وبواقي غناك
صاحبك وياك ع الحلوة وع المرة
يا صاحبي
شايل مجداف روحه في كفك
لو وقف العمر ايديه صفك
فرق في دموعك .. ما تخبيش
الضحكة يا صاحبي مسيرها تعيش
ياما دقت ع الأوجاع دقت
والحزن يهد ومابيبنيش
ماهو قال لك إن إحنا ( في ضهرك )
وحبايبك جيش
————————————
الشاعرة رباب الجورية 👇🏽👇🏽
.. وكأنك مش عارف مالك
و الكون كله زعله عشانك
واصحابك واقفين ع بابك
بحروف عن هم وجوع البطن
او حزن معشش لجنابك
والقصة ياصاحبي واضحة وضوح
قلبك مجروح باين من البوح
الحب دخل وسكن في الروح
اديته مجال.. وفتحت له باب
ونسيت ان انت ف مدينته
عايش ولكنك من الاغراب
صدقني ياصاحبي
الجوع ف البطن بيتداوى
واخدين علي وجعه ومره شافيك
لكن جوع قلبك
راح ياكل قلبك ويحلي بدمع عينيك
مساعيدي جايب جيشه وجايلك
والعربي بيقول انا ساندك
لكن..
فى الحب الكل غريب
هيشدوا حروفهم يوم شنقك
..
———————————
# وفاء على
امسح دمعك واصلب طولك
أوعى اليأس ف مرة يطولك
مهما يزيد الحزن عليك
ربك بكره يبدلهولك
لسه العمر معاك وقصادك
بكره الفرح يخبط بابك
واللي يضيع من حلمك لازم
ربك بكره يعوضهولك
بكره الحب عليك هيدور
تفرح فوق كنت ماتتصور
اوعى ياصاحبي ف يوم تتهور
وتسلم نفسك لدموع
كتفي ب كتفك واوعى ياصاحبي تبقى مابين الناس موجوع
ايدي ف ايدك قوم واستغفر
ده رجوعك لالهك وحده يبقى ياصاحبي احلى رجوع
_______________
#وفاء _علي
#ياجبل مايهزك ريح على
————————–
#محمد_طلعت
اما انتي يا صحبى
قلبي بيدعيلك
باللي انت و قلبك ما دعتهوش
أصل بتوحشني ف أخلاقك
ومعاني حروفك لمشاعري
لما أقعد جنبك متضايق
وبتطلب تسمعني ف شعري
وتخرج مني بخفت روحك كل مشاكل جوايا
انا لما بشوفك مع تعبي
بادلق من حبك فى دوايا
انا كل ما بكتب فى نهاية
وبشد ستارة علي المشهد
بلقاك فى سيناريو جديد مكتوبلي بحبر العشرة
وحب بيخرج من جواك
لاتنين اتربوا فى توب كستور
معمول بجامات
انا بمشي بأسمك فى حياتي
وبقول للناس إن احنا أخوات
—————————
# هيومة حمزة
رغم اني ماليش ف القيل والقال
انا جايه اقولك يا شاعرنا
غلف قلبك بغلاف من نور
وابعد عن كل صديق مغرور
واكتب من قلبك واملا سطور
ماتجيش علي نفسك لجل الغير
الغير ياما ليهم طبع ثقيل
وان كنت عزيز علي حد بجد
عمرة ما حيجرح ويقول ويغير
حط الاهداف قدام عينك
شرق غرب عد سنينك
حتلاقي كتير ناس عاوزينك
حتلاقي ضمير يفتح شراين
ويقولك الله يعينك…
هيومة حمزة
….
الرد عليك من اغلي الناس
دليل انك ظالم نفسك
وحداني ازاي ؟
و ازاي محتاس؟
ومعاك دايما احباب منك
وقبل الناس معاك خالق
بيطبطب بيراضي ف قلبك
ورغم انك واقف في مفارق ا طلبتش حد يكون سندك
لانك متربي وعودك صلب
تضحك وتداري حزن القلب
فالناس الظاهر يغويها
يشوفوا إن أنت مقضيها
ضحك و جد ولعب وحب
ويشوفوا الحزن بعيد منك
فتحس انك عايش وحدك
ضريبة كل كبير راجل
في دنيا والعة كمراجل
مفروشة حزن وهم وعك
ما المعدن بيبان في النار
راجل جد ولا هزار ؟
يا ابو عقل اكبر من سنك
ما شاء الله. الله اكبر
الحلو جاي ومقدر
وأصحاب العمر بتفرح لك
#عوض_سليمان
________________
حمال وصبور جداً جداً
لو حتى تقول عني باجامل
راح أقول وأزيد عنك عنداً
وإن حالك كان صعب ف دنيا
ودموعك سيل
أوحتى مبرر أحزانك خانه التعبير
حاتلاقي أخواتك هنا جنبك
من غير ما تقول فاهمين قلبك
جواك إنسان عمره ما يغلط
فاعل للخير
ما تخاف تهويش
وإن كنت حاتكتب عن حالك
أنا واثقة إن أحنا حانتباهى
برجولة شاعر بيكافح
على لقمة عيش
………………
#نادية البديوي ..👇👇👇👌
في ايه ياولاد ؟ جرى لكم ايه؟
مالكم ؟ مصاحبين الهم
واختوا عليه؟
مش قادرة اتحكم فى دموعى
بكلامكم ..سكنتوا الخوف
جوه ضلوعى ووجعتوا القلب
صحيتوا الدمعة على الخد
ليه كل كلماتكو حزيينة
والفرح .. فى حياتنا بيتعد
قادر ربك فى صبح وليلة
يشفى صدورنا ويزيح الكرب
ده بكلمة كن يبني العالم
وكلمة كن دنيا بتتهد
ماتيجو نرجع ليالينا
ونصالح ايامنا علينا
إدينا فى إيدين بعضينا
نفرح ونفرح اهالينا ونعيد الود
ونرجع كل ليالي السعد
ومعانا الشاعر مساعيدي
ومعانا سامح أبو هريدى
ووفاء جاية توفى جمايل
وطلعت للأحمال شااايل
ورباب ياما ربت أجيال
وسيد كلماته موااال
تعرفها من غير ماتشوفه
يلا ياولاد
قولوا للفرح يحني كفوفه
احنا خلاص اصحاب الدار
هنبطل نبكى ونحتار
ولا حزن هيتحكم فينا
بقلمنا بقى لينا قرار 💪
بقلمنا بقى لينا قرار 💪
