حنين الاشتياق
بقلم :الدكتورة ايه شريف
وإنتي بعيد شموس الكون بتتغـــرب
وبيسافر معاكي الفــــــرح مايقــــرب
يانور عيني..ف بعدك عمري يتسرب
وإنتي بعيد .. كلامي ف صمته بيـروح
وجاني العيد .. غناوي حزن بتنـــــوح
وصوت نايي .. حزين باكي .. بيطـوح
وإنتي بعيد .. باحس بالمكان ضيـــــق
ومتضايق .. وسامع خوفي بيزيــــــق
ومن غيرك .. بحبل الحيـــرة متعلـــق
وإنتي بعيد .. لغات الدنيا تتغيــــــــر
وصورة الحرف .. مطموسه وبتحير
لكن حبك ف قلبي عمـــره ما اتغيــر
وإنتي بعيد .. خريطة العالم إتمسحت
مدن قامت .. مدن ضاعت وإندثـــرت
لكن صورتك ف كل كياني إترســـمت
وإنتي بعيد .. زلازل دمرت مُدنـــــــي
رعود بتعود بتمحي من الوجود عدمــي
وعدمي معاكي آية من آيات خـُلـــــدي
وإنتي بعيد .. سنابل وساكنها مـــوت
عيدان القمح دبلانه ما تنفع قـــــــوت
منى عيني أشوفك لحظه قبل ما اموت
وطعم النوم لا زار جفني .. ف ليل ونهار
وطول اليوم .. وإمبارح .. مرار ف مرار
كلام اللوم .. بيجلدني بجمــــرة نـــــــــار
وشوفي النجمة لا هي سامعة ولا لامعه
ونور السكه .. ما هو دمعه وميت دمعه
غيابك طفا جوايا … ميتين شمعــــــــــه
سألتك ليـــــه .. بعادك طال وبيطـــــــول ؟
ورحتي لفين .. ما كنتي تقولـــــــي من الأول
عشان أشطب من ايامي ليالي البعد واتخيل
كلامك شهد رباني … وآآآآه يانــــــي
ما انا المظلوم وبتقولوا أنا الجانـــــي
وفاتح قلبي لحبــــك …. ولا جـــــاني
وإنتي بعيد .. جداول جافه بلا ميــــه
سواقي تدور … بتنعي حظ مال بيــه
ساعات وتفوت .. ونتلاقى أنا وهيـه
