نوبات الهلع .. معركة بلا خصم
بقلم / سمر جرجس مرقص
أخصائية إرشاد نفسي وأسري وزواجي وتعديل سلوك
عضو اتحاد المعالجين النفسيين العرب
عضو التحالف العربي لخبراء العلاج النفسي
في ثانية واحدة الدنيا ممكن تتشقلب 😞
وإنت ماشي عادي و انت بتضحك ، أو حتى و انت نايم في سريرك فجأة قلبك يخبط في صدرك كأنه هيهرب ، نفسك يضيق ، رجليك تسقع ، ودماغك تهمس لك بأعلى صوت و تقولك خلاص دي النهاية!
تحاول تهدي مش قادر.
تحاول تفهم مفيش تفسير.
واللي حواليك واقفين مش مستوعبين إيه اللي بيجرا ، وإنت نفسك مش مقتنع إزاي الموت كان قريب للدرجة دي!
وبعد دقايق قليلة النوبة دى بتمشي زي ما جات بس ✋
بتسيبك مرعوب ، غرقان في عرق، ومصدوم من السؤال اللي بيخبط جوه دماغك
إيه اللي حصل؟! أنا بتجنن؟! ولا فعلاً كنت هموت؟
اللحظة دي اسمها نوبة هلع 😶
ولو عدت عليك مرة مستحيل تنساها.
طيب يعني إيه نوبة هلع؟
نوبة الهلع هي هجوم مفاجئ من خوف قوى ، يخلي الجهاز العصبي يدخل حالة طوارئ كاملة …
كأن في خطر قاتل رغم إن الواقع آمن جداً
الجسم يعلّي الإنذار لأقصى درجة..
* ضربات قلب سريعة
* ضيق نفس وإحساس بالاختناق
* رعشة وعرق بارد
* دوخة
* ألم أو ضغط في الصدر
* تنميل في الأطراف
* إحساس إنك برا جسمك
* خوف من الموت أو الجنون أو فقد السيطرة
والأصعب؟!!!
إن الشخص بيكون مقتنع وقتها إنه بيموت فعلاً 🖤
ليه بتحصل نوبات الهلع ؟
مفيش سبب واحد لكن في عوامل بتزود احتمالية حدوثها زى ..
١ – القلق المزمن
٢ – الضغوط والصدمات
٣ – خلل في كيمياء المخ
٤ – الاستعداد الوراثي
٥ – المنبهات القوية زي الكافيين والمخدرات
والأهم لازم نعرف ان …
نوبات الهلع مش دلع ولا ضعف ولا قلة إيمان.
دي حالة نفسية معروفة وملايين بيعانوا منها.
طيب ايه تأثير نوبات الهلع على الحياة
النوبة نفسها ١٠ –٢٠ دقيقة لكن أثرها ممكن يفضل أيام.
١ – الشخص يبدأ يتجنب أماكن ومواقف…
يخاف يركب مواصلات، يخاف يدخل مول، يخاف ينام لو النوبة صحّيته قبل كده.
ويتحبس جوه دايرة اسمها ( الخوف من الخوف)
وده ببساطة اضطراب الهلع.
هل ليها علاج؟
أيوه… وبنسب نجاح عالية جداً
١) العلاج النفسي
العلاج المعرفي السلوكي (CBT) هو الخط الأول
يفهمك النوبة، يفكرك في لحظتها، ويعلمك تسيطر على جسمك.
* مع تدريبات تنفس عميق واسترخاء.
٢) العلاج الدوائي
أدوية تحت إشراف دكتور نفسي تنظّم كيمياء المخ وتخفف حدة النوبات.
٣) أسلوب حياة صحي
* رياضة
* نوم كفاية
* أكل متوازن
* تقليل قهوة ونيكوتين
الرسالة الأهم
الشخص اللي بيمر بنوبة هلع مش محتاج جملة “شد حيلك” ولا كلمة: “ما تخافش”
لأنه أصلاً جواه معركة شرسة محدش شايفها غيره
هو بس محتاج يسمع ان …
“اللي عندك مفهوم … مش هتموت … ومش هتجن … وإحنا معاك لحد ما تعدي”
وأخيرًا…
نوبات الهلع مش نهاية…
هي رسالة من جسمك بتقول ..
كفاية ضغط … ارجوك اسمعني شوية.
اللي بيواجه نوبة هلع مش ضعيف ده إنسان شجاع بيحارب خوف محدش شايفه
ولو عدّت عليك نوبة هلع قبل كده افتكر ان …
العاصفة مهما كانت قوية عمرها ما استمرت لازم بتمشي وتسيب بعدها سما أنضف ، ونَفَس أوسع ، وحكمة أعمق ♥️♥️
ويمكن اللحظة اللي حسّيت فيها إنك بتموت كانت أول لحظة رجّعتك للحياة
الى اصحاب نوبات الهلع
انت بطل .. انتى بطله 💪💪
