أجرت الحوار : ياسمين عبدالناصر
مصطفى رماح من أسيوط 22 سنة مركز أبنوب مؤسس أسرة أترك بصمة ومن رواد الطلاب فى الأنشطة الطلابية.
ولذلك سعينا إلى الحوار معه، فى البداية سألناه:
نود التعرف بالسيرة الذاتية لحضرتك؟
اسمى مصطفى محمود محمد عيد رماح واسم الشهرة مصطفى رماح، الفرقة الرابعة آداب تاريخ، شاركت في الأنشطة الطلابية فى سنة أولى جامعة كانت بدايتى فى الجوالة وبعد كده انضميت لمبادرة أطمن معانا وبعدين انضميت لمعسكر أعداد القادة وبدأت أعرف يعني إيه أنشطة طلابية وفهمت وبحثت فى الموضوع وعرفت حاجة اسمها أسر وتحاورت مع الناس الماسكة الأسر فى الجامعة، ورجعت آداب أنشات أسرة أترك بصمة، بدأت الأسرة بمستوى ممتاز جدا، وأنضميت للإتحاد فى سنة تانية، وأخذت المركز الأول ثلاث سنين فى المجال الفنى على مركز أبنوب، ومركز ثالث على مستوى الجامعة فى الفن التصويرى.
أزاى جاتلك فكرة مشاركتك فى الأنشطة الجامعية؟
الفكرة بدأت من ثلاث سنين لما لقيت الكلية فيها حاجات كتير محتاجين نقدمها للطلاب، انا كمصطفى نفسى كنت محتاجها وملاقتهاش اصلا فاللى انا ملقتوش متوفر حاولت أوفره أنا لطلبة الكلية.
أحكيلنا عن شعورك فى أول مشاركة ليك فى الأنشطة الجامعية؟
كنت مبسوط جدا لأن أول مرة تكون متسلطة الأضواء عليا، حسيت أن وجودى مهم واليوم اللى كنت بغيبه كان بيفرق جامد مع التيم الموجود.
هل أثرت الأنشطة الجامعية بشكل سلبى على دراستك؟
أثرت سلبى شوية لأن أنا بدأت أهمل فى المحاضرات بتاعتى حاجة بسيطة.
آى الفرق بين الطالب المشارك فى الأنشطة الجامعية والطالب العادى؟
بتبقى متاحة ليه مميزات كتير جدا غير الطلبة العاديين مبتقدر تتمتع بالمميزات دى.
من وجهة نظرك مالمطلوب من إدارة الجامعة لتشجيع الطلاب على المشاركة فى الأنشطة الجامعية؟
أنها تنزل مسابقات وأعلانات ودعايا اكتر تعرف الطلبة من أول مايدخلوا الكلية أننا عندنا أنشطة طلابية وأنواعها.
ممكن توجه كلمة لعميد الكلية بما إنها أخر سنة ليك فى الكلية؟
فى البداية طبعا أتقدم بكل الشكر للدكتور مجدى علوان عميد الكلية لأنه كان الدعم الأول لينا من قبل حتى مايبقى عميد كان بينزل معانا فى الأنشطة جنبا بجنب أخ أكبر لينا، وبعد ما أتعين معيد دعمنا أكتر وأكتر، وبقوله إحنا مسيطرين فى لجنة الأسر ولجنة الجوالة وعايزين نسيطر فى باقى اللجان.
