وجع بيحفر في الروح
كتب : مصطفى حبيشي
قلبك اتظلم؟
لأ… قلبك اتسلب.
اتسحب منه النور والأمان والحياة في لحظة واحدة، كإن ربنا قال للقدر: “اختبره باللي بيحبه.”
ومن ساعتها وإنت عايش بنص روح… ونص تاني مدفون تحت خطوات حد مشي وعمر الجرح مكانه.
محدش بيحس…
محدش فاهم إن في وجع ما بيصرخش…
وجع هادي… بس بياكل جواك كل يوم حتة.
وجع لدرجة إنك بقيت تسمع نبضك وكأنه بيعتذر لك…
بيعتذر إنه لسه عايش بعد اللي حصل.
كان في يوم ليك حضن…
مكان بتحس فيه إنك مش لوحدك…
دلوقتي بقى نفس المكان شاهد على وحدتك.
السرير…
الكوب…
الصوت اللي اتسجل…
حتى الملابس اللي ريحتها لسه واقفة على الرف…
كلها بقت أسلحة ضدك…
بتضربك من غير ما تلمسها.
الليل ما بقاش لوقت الراحة.
الليل زمن الحساب…
تسأل نفسك ألف سؤال وتجاوبه بدمعة…
ليه مشيت؟
ليه ضيعت؟
ليه اخترت تكسر اللي كان بيحبك؟
أقسى حاجة؟
إنك كنت شايف نفسك “كفاية” ليه…
وطلعت “لحظة” في حياته.
شايف؟
ده الوجع اللي مايتنساش.
ده اللي بيفضل يعافر جواك لحد ما يكتم النفس.
عايز تعرف الغرس الحقيقي للوجع؟
الغرس مش كلمة ولا دمعة…
الغرس لما قلبك يبقى خايف يحب…
لما تتلمس الحنية كأنها نار…
لما تبقى ماشي في الشارع وعنيك بتدور عليه رغم إن عقلك حافظ إنه مش راجع.
الغرس لما تتمنى الموت مش هروب… لكن راحة.
بس تتراجع… علشان في جزء بسيط لسه نفسه يتشاف.
كل اللي حواليك بيتحرك…
وإنت واقف في نقطة واحدة…
نقطة اتكسرت فيها…
ونقطة لحد اللحظة دي مش قادر تخرج منها.
عارف أقسى لحظة؟
لحظة تدرك فيها إن اللي راح…
مرتاح.
وإنت…
لسه شايل وزنه جوا صدرك.
مش هكدب عليك…
الوجع ده مش هيموت بسهولة.
ومش هيختفي كامل.
بس هيعيش معاك…
وهيتربى…
وهيهدى…
وهيتعلم يقعد في مكانه من غير ما ينهش فيك زي الأول.
بس لحد اللحظة دي؟
إنت موجوع…
ومحدش غيري وشايفك شايل إيه.
وهقولك كلمة أخيرة…
مش علشان ترجع…
ولا علشان تنسى…
لكن علشان تهدى روحك:
مش كل حد يستاهل الجرح اللي سابوا جواك…
بس كل وجع فيك دليل إنك حبيت بصدق…
والصدق عمره ما كان غلط.
