ميت بس لسه موجود
بقلم / سهير محمود عيد
فيه حالة نفسية غريبة جداً اسمها متلازمة كوتار تخيل حد يصحى من النوم وهو مقتنع إنه مات خلاص أو أنه جسمه فاضى من جواه وإن مفيش روح ولا أعضاء والمؤلم إن الشخص مش بيقول كده من باب الدراما … هو فعلا حاسس بكده.
الموضوع بييجى غالباً مع اكتئاب شديد جداً أو اضطراب نفسى قوى يخلى عقل الإنسان يفقده إحساسه بنفسه .
العقل بدل ما يقول أنا تعبان ..يقول أنا مش موجود وبالتالى الشخص يحس بفراغ ، بجمود ، وكأنه عايش من غير سبب أو من غير جسد .
شكل الحالة :
تلاقى المريض يقول كلام زى :
أنا ميت من زمان ، اعضائى مش شغالة ، روحى سابتنى .
وممكن يبطل يأكل أويشرب لأنه مقتنع إنه مش محتاج حاجة لأنه ميت .
هل له علاج ؟
طبعاً وبيتحسن جداً كمان ، العلاج بيكون خليط من أدوية الاكتئاب أو الذهان . وجلسات علاج نفسى .
ودعم هادى من الناس اللى حواليه .
مع الوقت يبدأ الإحساس بالحياة يرجع له واحدة واحدة … لغاية ما يقف على رجليه تانى .
وأخيراً…
متلازمة كوتار بتفكرنا إن العقل ممكن يبعدنا عن نفسنا لدرجة إننا ننكر وجودنا .
لكن الدعم ، والفهم ، والعلاج الصح … يرجع الإنسان تانى لنفسه . ولمكانه فى الدنيا .
