*عرق الجبين دهب*
– كلمات/
هشام عبدالرحيم –
-إهداء لكل إيد بتشقى
وتكد وتكافح بشرف.
ياللى الساعات بتعدى
فوق ضهرك سنين.
يا مونس السكة..
بصوت يا معين.
ياللى إيديك شالت..
وما ملت يوم شيل.
والليل يشوفك..
يقول ياحظ الطيبين.
ياللى بتضحك للوجع..
والقلب فيه ميت آه.
وتقول يا رب الرضا..
والكل يسمع غناه.
الدمعة فى عينيك..
مش ضعف ولا انكسار.
دى بحر من عزة..
ما يعرف أخرها
إلا اللى فيه تاه.
يا ساند الحيطة..
وإنت اللى ساند البيت.
ياللى بنيت القصور..
وبالستر بس اكتفيت.
ياللى الصدا فى الحديد..
بيخاف من لمسة إيديك.
وياللى باسم الحلال..
فى كل شدة احتميت.
إفرح بصنعة إيديك..
ده الرب هو اللى بارك.
ويا بخت كل اللى عاش..
من رزقك وفيه شارك.
اللقمة فى بيتك..
طعمها شهد وشفاء.
عشان عرق شقاك..
هو اللى كان متبارك.
إرفع جبينك لفوق..
ياعمود بلادنا وسندها.
ياللى بصمودك قدرت..
تهد المحنة وتهزمها.
الناس تشوفك عامل..
وأنا أشوفك ملك.
شايل أمانة عيالك..
ووافى بعهدها.
تسلم إيديك الخشنة..
فى الجنة ليها مكان.
دانا كل مابشوفك..
بحس انوا باقى أمان.
عيدك يا بطل الحياة..
فى كل شمس بتطلع.
مادام الضمير حى..
والقلب مليان إيمان.
……………………….
