صحتك بالدنيا الجزء الثاني
وفاء سليمان
بعد ما كلمتك عن التهاب الاعصاب الطرفية وجاوبتك على سؤال هو بيحصل ازاي ولي ؟
اخر سؤال وقفنا عنده وهو العلاج ..إي هو علاج الأعصاب الطرفية ؟
وإي المفروض تعمله يقلل من الأعراض ؟
كتبت وفاء سليمان محمد 👇
تعالي بدون مقدمات كتير نخش في الموضوع
أول حاجة اتفقنا عليها أن التهاب الاعصاب الطرفية بيعمل وجع ناس كتير مش بيستحملوه
فأكيد أول حاجة تيجي ف بالك كعلاج هي المسكنات وهنا بنستعين بأي مسكن في الأول زي كتافلام cataflam عادي وممكن بعد فترة كبيرة وفي بعض الحالات بس نحتاج ندخل بمسكنات عصبية بتأثر على المواد العصبية في جسمك ومتشغلش بالك بيها حاليا لأنها لا م تتصرف تحت إشراف ورعاية طبيب
طيب اي كمان ؟
بما إن دي أعصاب والمسئولة عن احساسك ونقل المؤشرات اللي بتتعرضلها
فالألم هيكون موجود طول ما هي شغالة
ففي نوع من الأودية بيقلل الإشارات العصبية دي شوية فيريحك من الاعراض
سامعك بتقول زي اي الأدوية دي الحقني بيها
زي Neurontin و ال Gaptin و دول مادة ال Gabapentin و في ال Lyrica وDepapalin ودول مادة ال pergabalin
وقبل ما تستعجل وتبعت تجيبهم الأدوية دي لازم دكتور اللي يوصفها وخد بالك بتسبب عدم اتزان ودوخة فبتتاخد قبل النوم
وقولتلك المرة اللي فاتت إن نقص فيتامينات الأعصاب بيلعب دور مهم في التهاب الاعصاب زي فيتامين B12
فعشان كده من الحاجات المهمة في العلاج هي فيتامين B12 زي حقن ال Becozym أو neuroton
وفيه منهم الأقراص زي milga وneuroton لكن الحقن هنا بتكون اكتر فعالية
في حاجة تانية ممكن تلاقيها في علاجك ؟
اه خليني أفكرك باسم الحالة اللي بنتكلم عنها “التهاب الاعصاب الطرفية”
واهم ما فيها كونها التهاب عشان كده بنستعين بمضاد اكسدة مهم في حالات التهاب الاعصاب وهو مادة ال alpha lipoic acid زي الموجود في الThiotacid او ال neuropatex
اخر حاجة دهانات ممكن تستعين بيها
عشان تقلل الوجع
فيه دهان مشهور في اوجاع العضم والأعصاب وهو ال Capsin أو capscur وده لو بتسال مش مسكن ده فيه المادة الفعالة لفلفل الحار
ايوة زي ما سمعت وده بيعمل احساس حرقان في المكان اللي بيتحط فيه لكن بيقلل وجع الأعصاب وفي ناس بترتاح عليه
اخر حاجة ممكن تستعين بكريم مخدر زي lidocaine
نهاية حابة أكد عليك أن إي علاج من دول لازم يتصرف بعد كشف وتشخيص من دكتور متخصص
و زي ما قولتلك الموضوع بسيط وكل حاجة ليها علاج لكن لازم ناخد بالاسباب وتخلى بالك من صحتك وتدخل لجسمك الفيتامينات اللي محتاجها وتبعد عن التدخين وتدخل الرياضة في يومك ولو نص ساعة مشي في اليوم ولو مريض سكر تابع سكرك بانتظام
صحتك بالدنيا الجزء الثاني
