أنا و الشتا
كلمات: هانى فَتُّوح
أنا و الشتا أصحاب
أنا و الشتا أغراب
قافلين على نفسنا الأبواب
لا إنطوائية ولا ….إكتئاب
☆☆☆☆
أنا والشتا زى بعض
فينا كتير من بعض
بنحب ريحة البرد
وصوت المطر على الأرض
☆☆☆☆
و المشى بالليل فى الشوارع
وصراع مابيني وبين كل الموانع
وفى ودني صوت صفير قطر الصوامع
بيصحى فينا من تاني المواجع
☆☆☆☆
و الليل بيهمس فى الودان
ويضمني برقة وحنان
وأعزف له على نغم الكمان
وأسهر و أغني يا ليل أمان
☆☆☆☆
ليل الشتا برد و دفا
ألفة و صفا
أحاسيس بعيد مطرفة
وحاجات كتير متحرفة
☆☆☆☆
حضن الشتا دفئ و حنان
وذكريات أوقات زمان
وفنجان قهوه بحبهان
وصوت الراديو و الروقان
☆☆☆☆
عزف المطر زى الدوا
دوا للقلوب من الجفا ومن الصدا
وساعات بتروي العطشانين للرؤى
وتجمع ما بينهم يمكن فى يوم تلقى الرضا
☆☆☆☆
وساعات باحس إني تايه في الوجود
وفي عز ما كان الكل خايف من صوت الرعود
أنا بالنسبة لي صوت الرعد رمز للصمود
و بوق بينده على الي تاه علشان يعود
☆☆☆☆
ومهما كان البرد قاسي على القلوب
زى الجليد الصلب يصبح يدوب
ويدوب معاه الحزن من قبل الغروب
طبع الشتا على القلب و ختم له بالمكتوب
☆☆☆☆
أنا بعشق كل لحظات السكون
وأسرح بعقلي بعيد منين ما يكون
أنا لما باحب قلبي بيحب بجنون
زي الصبايا المكسوفين بيدارو العيون
☆☆☆☆
أنا ماضي عقد بيني وبين النجوم
ويشهد عليا القمر وقت اللزوم
إني أقريت بالسهر ودفعت كل الرسوم
و نزعت من قلبي بإيديا كل السهوم
☆☆☆☆
أنا و الشتا أصحاب
أنا والشتا اغراب
قافلين على نفسنا الأبواب
لا إنطوائية ولا إكتئاب
