كتبت وفاء سليمان محمد
هي الإصابات التي يتعرض لها الإنسان بشكل يومي تحتاج إلي تطهير ⁉️
تعرف إن حتى الجروح اللي بتتعرضلها بشكل يومي لازم تعمل ليها إسعافات أولية؟
من أبسط الأمثلة هي دخول شوكة أو حاجة خشبية أو دبوس أو أي حاجة مدببة في الجلد فتعملك جرح وممكن يكون مصدر عدوي للجسم
و معظمنا ممكن يتعامل معاها غلط
فتعالي نعرف إي هي الخطوات المظبوطة لتجنب أي خطر :
•أول حاجة لازم نعملها هي غسل مكان الإصابة بالماية و الصابون
•نبدأ نستعمل ملقاط في إننا نسحب الحاجة المُسببة للجرح من طرفها الظاهر من غير ما نسبب أي حركة ليها (تجنب تماماً لو الحاجة مش ظاهرة قدامك أنك تزود فتحة الجرح عشان توصلها)
•بعد كده بتبدأ تضغط على مكان الجرح عشان نطلع كمية من الدم اللي ممكن تكون تلوثت بسبب الجرح
•نغسل مكان الجرح مرة تانية بالماية و الصابون
•نلف مكان الجرح بشاش جروح أو قماش نضيف من غير ما نخليه ضاغط على المكان
طب لو مش عارف اطلعها أعمل اي ؟
زي ما قولنا متحاولش تفتح في مكان الجرح لأن بيزود من احتمال العدوي و وقتها اتوجه لأقرب مستشفى عشان يقوموا باللازم
و لازم ناخد بالنا لو الحاجة المُسببة للجرح كانت ملوثة أو مختلطة بحاجات ملوثة زي القمامة أو غيره لازم تستشير طبيب عشان لو حالتك تحتاج مضادات حيوية او أدوية عشان نتحكم في العدوي اللي ممكن تحصل
