لما النفسية بتتعب الجسم بيصرخ!
بقلم / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
عمرك حسّيت إنك تعبان من غير سبب؟
الدكتور يقولك “التحاليل تمام” وانت حاسس إنك بتتقطّع من جوه؟
– وجع في المعدة
– صداع مزمن
– ضغط عالى
– ضربات قلب سريعة
وكل حاجة فيك بتقول “أنا مش تمام” بس مفيش مرض واضح؟
ساعتها لازم توقف وتفكر!!
يمكن مش جسمك اللي عيان يمكن نفسك اللي وجعاك ؟!
اللي بيحصل ده مش خيال ولا تمثيل دي حالة اسمها ( الأمراض النفسجسمانية) يعني الأمراض اللي بتبدأ من النفس وبتظهر على الجسم.
أيوه ( الزعل، القلق ، الكبت ، الخوف، الحزن ) كل ده ممكن يتحوّل مع الوقت لوجع حقيقي في جسمك
خد بالك مشاعرنا ليها صوت ولما بنسكتها كتير بتتكلم من خلال جسمنا !!
خليني أقولك مثال بسيط..
واحدة طول الوقت بتكتم جواها بتسكت علشان البيت يمشي ، او الشغل يمشي، او الناس ترضى.
بعد فترة بدأت تشتكي من القولون، والمعدة دايماً بتوجعها نومها بقي خفيف و مخها شغّال ٢٤ ساعة.
هي مش محتاجة دوا قد ما محتاجة تتكلم و تفضفض وترتاح.
جسمها بيصرخ باللي قلبها مش قادر يقوله.
ونفس القصة بتنطبق على ناس كتير زى مثلاً..
– اللي بيشيلوا الهم أكتر من طاقتهم، بيجيلهم ضغط وسكر.
– اللي بيفكروا كتير ومش بيعرفوا يهدوا بيشتكوا من صداع مزمن وتشنجات.
– اللي بيعيشوا في توتر مستمر من كتر القلق بيتعب قلبهم وجهازهم الهضمي.
خد بالك ان ده له تفسير علمي
لما النفس تتوتر المخ بيفرز هرمونات زي الأدرينالين و الكورتيزون ودي بتخلي الجسم في حالة استنفار طول الوقت …
النبض يزيد ، المعدة تتقل ، الضغط يعلى، والمناعة تضعف.
يعني ببساطة النفسية التعبانة بتخلّي الجسم يدافع عن نفسه بالغلط!
العلاج الحقيقي بيبدأ لما تعترف إن نفسك ليها حق زَيّ جسمك بالظبط.
إنك تسمع لنفسك قبل ما تنهار تتكلم بدل ما تكتم ترتاح بدل ما تكمّل على أعصابك.
الجسم محتاج دواء لكن النفس محتاجة أمان وراحة وصدق مع الذات.
ومش ضعف إنك تروح لدكتور او اخصائى نفسي دي أول خطوة في طريق الشفاء.
تعالى اقولك شوية خطوات للعلاج!!
١- العلاج النفسي (المعرفي السلوكي)
أهم خطوة المعالج بيساعدك تفهم إزاي أفكارك السلبية ومشاعرك المكبوتة بتأثر على جسمك.
لما تتعلّم تلاحظ أفكارك وتبدّلها، جسمك نفسه بيبدأ يهدى ويستريح.
٢- تنظيم الحياة اليومية
نام كويس، كل كويس، وحط وقت راحة لنفسك من غير ذنب.
التعب النفسي بيقل لما اليوم يبقى فيه توازن.
٣- الفضفضة والعلاقات الصحية
الكلام علاج اتكلم مع حد بيريّحك، أو حتى اكتب اللي جواك.
الكتمان بيحوّل الوجع النفسي لوجع جسدي.
٤ – الرياضة والتنفس العميق
١٠ دقايق مشي في اليوم بتفرّق جدًا.
النفس العميق بيهدي الأعصاب ويخلّي الجسم يستقبل الهدوء بدل التوتر.
٥ – المتابعة الطبية
تابع مع دكتور باطنة أو قلب لو في أعراض جسدية، بس خليك فاكر
الدوا لوحده مش كفاية، لازم تعالج النفس مع الجسم.
خد بالك من العلامات الأولى!
١ – قبل ما المرض يسيطر الجسم بيبعت إشارات بيقولك بيها ( أنا تعبان )
٢ – وجع متكرر في نفس المكان من غير سبب.
٣ – صداع أو دوخة بتحصل وقت الزعل أو القلق.
٤ – خمول مستمر رغم إنك نايم كويس.
٥ – القولون والمعدة بتتعب أول ما تتوتر.
٦ – ضربات قلب سريعة أو رعشة بسيطة في الإيد.
لو العلامات دي بتتكرر متستهونش بيها.
دي مش تعب بسيط دي استغاثة من نفسك بتقولك اهتم بيا قبل ما أنهار
نصايح بسيطة بس بتفرق جداً في العلاج
١ – اتكلم
حتى لو مع ورقة أو شخص قريب بيريّحك الكتمان سم
٢- خد لنفسك وقت راحة يومياً بعيد عن التليفون والزحمة.
٣ – مارس رياضة خفيفة
المشي أو اليوجا بيخلوا الجسم يفرز هرمونات سعادة.
٤ – نظّم نومك وأكلك
لأن الجسد والنفس مرتبطين ببعض أكتر مما تتخيل
٥ – اتعلّم تقول “لأ” وقت اللزوم مش لازم ترضي الكل علشان تفضل محبوب.
٦ – لو حاسس إنك غرقان اطلب مساعدة. الاخصائى النفسي مش آخر حل هو بداية الطريق الصح.
أخيراً …
خليك فاكر دايماً ان الوجع النفسي لو ما اتسمعش هيتكلم بصوت الجسم.
اسمع لنفسك و صالح روحك و سامح ذاتك واهتم براحتك النفسية زَيّ اهتمامك بالأكل والشُرب.
مش ضعف إنك تتعالج نفسياً
الضعف الحقيقي إنك تسيب روحك تتوجع لحد ما جسمك ينهار 💔
