مواسم الحزن الهادئ
( الاكتئاب الموسمي)
كتبت / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
فيه نوع من الحزن بييجي من غير سبب واضح …
لما تفتح الشباك تلاقي السما رمادي تحس إن جواك كمان اتعكر بنفس اللون الرمادى
تحاول تضحك ، تتكلم ، تشتغل بس جواك في حاجة بردانة ومطفيّة ، كأن النور اللي جواك بينسحب بهدوء
الأيام دى بتحس فيها إنك مش إنت…
كل حاجة حواليك زي ما هي بس جواك في حاجة اتبدلت 😪
ضحكتك مش طالعة ، ونومك تقيل، ومفيش دافع لأي حاجة.
تقول يمكن تعب؟ يمكن ملل؟ بس الحقيقة إن اللي جواك مش صدفة
ده نوع من الحزن ليه ميعاد، وليه موسم كمان اسمه الاكتئاب الموسمي
الاكتئاب الموسمي — أو Depression is seasonal
ده مش مجرد “مزاج شتوي” دي حالة نفسية حقيقية بتظهر غالباً مع دخول الخريف والشتا وتختفي أول ما الربيع ييجي ويرجع النور والدفا 🌅
طب إيه اللي بيحصل فينا؟
الجسم في الفصول دي بيتأثر بعدة عوامل أهمها قلة ضوء الشمس وده بيخلي هرمون “السيروتونين” — المسؤول عن تحسين المزاج — يقل وهرمون “الميلاتونين” يزيد فـ نحس بالكسل، النعاس، والميل للعزلة 😔
وفي نفس الوقت الساعة البيولوجية بتتلخبط فـ نبدأ نحس إن في حاجة مش متظبطة جوانا.
الأعراض بتبدأ إزاي؟
تلاقي نفسك مش عايز تعمل حاجة ، الطاقة قليلة ، النوم كتير ، الأكل زيادة خصوصاً النشويات والحلويات ، والمزاج متقلب.
ممكن كمان تحس بذنب من غير سبب أو إنك فقدت قيمتك أو اهتمامك بالحاجات اللي كنت بتحبها.
وساعات بيبقى فيه نرفزة سريعة أو رغبة تبعد عن الناس.
طيب مين أكتر ناس ممكن يجيلهم؟
١- الناس اللي عندهم تاريخ مرضي بالاكتئاب أو اضطراب ثنائي القطب.
٢ – اللي عندهم حد في العيلة بيعاني من الاكتئاب الموسمي.
٣ – اللي عايشين في بلاد قليلة الشمس أو الجو فيها دايمًا بارد.
٤- الستات كمان أكتر عرضة من الرجالة.
طب نعمل إيه علشان نكون كويسين؟
١ – ما تسكتش
الخطوة دى مهمة جداً 💪
لو حاسس إن حالتك مش طبيعية احكي ، اطلب مساعدة ، اتكلم مع حد قريب منك أو مع مختص. الكتمان بيزوّد وجعك 😔
٢ – التعرض للشمس
حتى لو الجو بارد خُد نص ساعة كل يوم تتعرض فيها لضوء النهار – الصبح بدري أو قبل الغروب – هتفرق جدًا في حالتك النفسية.
٣ – مارس أي نشاط بدني
المشي ، الجري ، أو حتى التمارين في البيت ، الحركة بتنشّط هرمونات السعادة وبتقلل الإحساس بالحزن والملل.
٤ – غير الجو
لو تقدر تروح مكان فيه خضرة أو بحر أو حتى كافيه مضيء ومليان حياة، اعمل كده.
الطبيعة والضوء ليهم تأثير ساحر على النفس
وأحيانًا الطبيب ممكن يوصف علاج دوائي لفترة معينة يساعد الجسم يستعيد توازنه، وده لازم يكون تحت إشراف مختص.
اخيرا ..
الاكتئاب الموسمي مش ضعف ولا ( كسل) ولا (دلع) هو اضطراب بيحصل لأن الجسم والنفس بيتأثروا سوا
زي ما الشتاء له وقته الحزن كمان له أوانه 🌿
بس دايماً بعد الشتا بييجي الربيع وبعد الغيم بيطلع النور
خليك مؤمن إنك هتعدي وإن الشمس اللي بتتأخر في السما عمرها ما بتنسى طريقها لقلبك♥️☀️♥️
