شارع فؤاد
حوار مع الشاعر علي حسن
حاورته : لمياء جواد الإدريسى
قيل : الشعر ليس وديعًا دائماً الشعر مخيف لأنّه لا يقف حيثما نضعه لا يأخذ إذناً من أصحاب المكان ليحتل الشاعر يدخل، متى أراد، لسنا محميين ضدّ الشعر. و لأننا في حضرة الشعر يسعدنا أن نلتقي بشاعر قلمه بديع يسعدني أن ألتقي بالشاعر على حسن من الأقلام الواعدة في الشعر العامي في البداية
*هل يمكننا أن ندخل عالم الشاعرعلي حسن كإنسان أولاً وَكشاعرثانياً؟
– في البداية خليني أعرفك على نفسي أنا اسمي علي حسن علي من مواليد محافظة الإسكندرية شاعر عامية مصري و حاصل على بكالوريوس التمريض جامعة الأسكندرية.
* متى بدأ الشاعر علي حسن الكتابة؟
– حياتي العملية يمكن مختلفة شوية عن حياتي ككاتب ، بس أنا في العموم إنسان بيحب المحاولة ، و التجربة ، وبيحب يعمل الحاجة اللي بيحبها و لو كان طريقها أصعب من طرق نجاح سهلة تانية انا بدأت كتابة في ٢٠١٨ ، كنت وقتها بحب القراية و وقع تحت يدي دواوين شِعر عامية و حبيتها جداً ، لقيت نفسي في الفن دا و كانت الطريقة الوحيدة اللي بعرف اعبر عن نفسي فيها ، مشاعري و أفكاري وأسراري و توجهاتي و تجاربي ، من هنا بدأت الرحلة
* ما الذي جذبك في الشعر العامي كطريقه للتعبير الإبداعي؟ – الشِعر بالنسبالي بيكون طالع من الشارع و حكاوي الناس البسيطة ، عشان كدا بيشدني الشِعر العامي عن الفصحى ، لأنه أسهل بكتير للناس إنها تتلقاه و تفهمه
* ماهو الباب الذي تفتحه القصيدة العامية لك؟
– باب لإكتشاف نفسي اكتر .
* هل القصيدة قلعة علي حسن التي يحتمي بها من عوالم الحزن العاصفة أم أنها نافذه يطل منها على أشيائه وهمومه الشخصيه؟
– زي ما قولتلك بحس إني لما بمسك ورقةو قلم بكشف كل اللي جوايا
* وأنت تكتب قصيدتك بماذا تفكر؟ هل تفكر بالقارئ أم بهمك الشخصي؟
– أكتر حاجة كانت بتبسطني في الكتابة لما حد كان يقولي إن فيه سطر كتبته بيعبر عنه أوي أو إني وصفت كل المشاعر اللي مش عارف يقولها في قصيدة ليا وبالتالي أنا أفكر بنفسي والقارئ وبهمنا المشترك * حدثنا عن أعمالك وعن الأعمال المشارك بها بمعرض الكتاب لعام ٢٠٢٤؟
– ٢٠١٨ أول سطر و أول محاولة لكتابة قصيدة ٢٠١٩ ضيف شرف حفل هشام الجخ بالمسرح الكبير بمكتبة الاسكندرية ٢٠٢٠ أول حفل منفرد بالإسكندرية – تم الغاءه بسبب حظر كورونا- ٢٠٢١ أول حفل بمسرح ساقية الصاوي قاعة النهر و تم تصنيفه أعلى ثالث حضور بحفلات الشِعر الموسيقي ٢٠٢٢ ثاني حفل بنفس المسرح و نفس القاعة و كالعادة كان البرنامج و الحفل و الجمهور متميز جداً ٢٠٢٣ تم توقيع عقد اول ديوان لنزوله بمعرض القاهرة الدولي للكتاب ٢٠٢٤ و سنة ٢٠١٨ حصلت على مركز أول إبداع على مستوى جامعة دمياط في الشِعر العامي أما بالنسبة لديواني الذي أشارك به في معرض الكتاب هذا العام الديوان دا اتكتب في فترة من ٢٠١٩ لحد ٢٠٢٣ ، اوقات كتير كنت بخاف من الكتابة عشان بحس انها بتكشف حاجات جوايا مش المفروض تطلع للنور ، بس مكنتش اعرف اعبر عن اللي بحسه غير بالورقة و القلم ، و كان اكتر حاجة بتفرحني دايماً لحظة انتهاء قصيدة بحبها ، ديوان “شارع فؤاد” بيتكلم عن جميع التجارب اللي مريت بيها خلال الـ ٥ سنين اللي فاتوا ، عشان كدا كنت خايف من الخطوة دي و اتأجلت سنين كتير ، أنا كل أملي بعد عُمر طويل حد معرفهوش يمسك الكتاب دا في مكانٍ ما و يعجبه و لو سطر من قصيدة ، و دي حاجة هتخليني عايش دايماً وسطكم.”شارع فؤاد” بيعبر عن كل تجاربي و كل المشاعر اللي حسيت بيها ، كل الأوقات الصعبة ، و كل الأوقات الجميلة ، كل الخبطات و الوقعات و الوِحدة و الخذلان و الفراق و الخوف و مشاعر الحب و السعادة والطموح و الأمل والشغف
* القصيده لغز وعلى القارئ أن يبحث عن مفتاح هذا اللغز هل تتفق أم تختلف مع هذا الرأي؟
– القصيدة أبسط بكتير من إنها تبقى لُغز و نقعد نحل فيه ، زي ما قولتلك القصيدة بتبقى طالعة من الناس البسيطة ،
* ما الذي تمثله لك قصيدة الفصحى؟
– أنا بحب القصيدة الفُصحى جداً خصوصاً إن الشِعر زمان كان مقتصر على الفصحى فقط لكني بميل للعامية أكتر في العصر الحالي
* من هو الشاعر الذي كان له الأثر الأكبر في تكوينك الشعري ومن هو مثلك الأعلى في الوقت الحاضر؟
– مفيش شاعر بعينه أقدر أقول إنه مثلي الأعلى أو إن كان ليه تأثير كبير عليا ، كل شاعر و ليه تجاربه المختلفة و أدواته و أسلوبه اللي مينفعش يكون شبه التاني ، وأنا بحب أقرأ للناس كلها بدون تمييز قريت لشُعرا كتير جداً لو قعدت أذكر أسماءهم مش هخلص ، بس يمكن أبرزهم أحمد فؤاد نجم و الأبنودي و صلاح چاهين من الجيل القديم و من الجيل الحالي مصطفى إبراهيم و نبيل عبدالحميد و عمرو حسن و حسام إبراهيم .
* هل تعتبر أن شعرك هو نتاج تجارب ذاتيه أم أنه مجرد وحي وإلهام من تجارب الآخرين؟
– فيه قصايد بتكون تجارب ذاتية بحتة و فيه قصايد بتكون عن تجارب الآخرين
* كيف تقيم لنا حالة الشعر في الوقت الحاضر؟
– أناأقل بكتير من إني أقيم الشِعر في الوقت الحالي ، لكن ممكن أقول إن السوشيال ميديا أثرت بشكل سلبي على أغلب الشُعرا ، الموضوع بقا بيزنس و اللي بيعرف يعمل ماركتنج لنفسه أحسن بيبقى أشهر بخلاف المحتوى و التجربة ، لكن فيه بعض الإستثناء ات من الشُعرا المشهورين أصحاب تجارب ملهمة و مهمة
* ما هو تاثير مواقع التواصل الاجتماعي هل كان لها تأثير سلبي أم إيجابي على تجربتك الشعريه وهل حققت لك الإنتشار الذي تطمح إليه؟
– السوشيال ميديا بتأثر بشكل كبير على الكاتب في الوقت الحالي ، إعجاب الناس بالفن بتاعه بيفرق ، دعم الآخرين بيخلي الإنتاجية و الإبداع أكبر بكتير ، بالنسبالي السوشيال ميديا كان ليها أثر ايجابي كبير إني أكمل في الطريق دا
* ما هي الصعوبات التي واجهتها كشاعر شاب في بداية رحلتك نحو الإبداع ؟
– الصعوبات اللي واجهتني اني زيي زي أي حد بيعمل فن في بداية مسيرته محدش بيبقى فاهم أوي هو بيعمل إيه و ليه
* ما هي النصيحه التي تقدمها للشعراء العاميين وللقارئ المهتم بالشعر العامي؟
– على رأي محمود درويش ” لا نصيحة في الحب لكنها التجربة ، لا نصيحة في الشِعر لكنها الموهبة
* من هو الداعم الأول لك في مسيرتك الشعريه؟
– الداعم الأهم ليا من بداية كتابتي هو صديقي و أخويااحمد زكي ، و أهلي كان ليهم دور مهم جداً في تجربتي
*ماهي الكلمه التي تحب أن نختم بها حوارنا معك؟
– كلمة أخيرة ، أتمنى الديوان يعجبكم و تتبسطوا بيه ، و تلاقوا فيه نفسكم و تجارب تشبهكم. وشكراً
* الشاعر علي حسن سعداء لحوارنا معك وأحب أضيف إني أعتبر نفسي واحدةمن جمهورك وأتمنى لك المزيد من التألق والنجاح .
ديوان شارع فؤاد
الشاعر علي حسن
#معرض_القاهرة_الدولي_للكتاب2024
