رساله لكل زوج كن قد المسؤولية
كتبت/ وفاء المصري
هو إن الزوج بيرجع البيت بيفضل لازق وشه في الموبايل لحـد مـا ينام ..!؟
الحقيقة ان الموضوع ده مؤذي
رغم إنه يبان بسيط حضرتك كزوج بتكون تعبان طول النهار في الشغل وما بتصدق إنك ترجع عشان تفصل وتريح شوية ومن حقك فعلاً تفصل شوية لكن ده مش معناه إنك تتخلى عن دورك كزوج وأب ..! زوجتك عندها احتياجات مهمة زي إنها تفضفض ومهم إنك تسمع حكاياتها المش مترتبة ، وإنك تسمع معاناتها مع الولاد طول اليوم وتطيب بخاطرها بكلمتين ، تقول لها رأيك في حاجة هي محتاجة منك رأي فيها وتسمع منك كلمتين حلويين ، محتاجة إنك تشاركها تفاصيل يومها الكلام ده مهم جداً ومش حاجة تافهة ، ولما هي بتطلب منك ده مش معناه إنها مش مقدرة تعبك لكن هي فعلاً محتاجة ده ، غير إنها بتعتبر إن الكلام معاك لغة حب وتواصل وإندماج .
الولاد محتاجين إنك تتكلم معاهم ، تلعب معاهم ، تحل مشاكلهم ، وتقول رأيك في الرسمة اللي رسموها ، وتسمع شكاويهم البريئة الكبيرة بالنسبة لهم وإنك تشارك أمهم في مسئوليتهم .
دورك في البيت أكبر من إنك تجيب فلوس وطول ما انت بتختزل دورك في الإنفاق بس هتفضل شايف إحتياجاتهم تافهة وهتشوف طلبهم دي عدم تقدير لتعبك وتحميل زائد عليك مش أكتر ، وده مش حقيقي إفصل وريح شوية وبعد ما تريح شوف أهل بيتك محتاجين إيه ، و تلبية الإحتياجات دي مش محتاجة زوج متفرغ ، ولكن محتاج منك شوية تركيز وإحسان ف إستغلال الوقت اللي احنا بنسميه quality time وقبل كده إنك تكون عارف أهمية ده ؛ أهل بيتك اللي انت تعبان عشانهم طول اليوم محتاجين منك حاجات تانية زي إحتياجهم للفلوس ويمكن أكتر من الفلوس –
