الطبطبة الرقمية !!
حب بقلوب افتراضية ولا طبطبة حقيقية
بقلم / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
في زمن السوشيال ميديا بقى الإحساس بالحب والدعم ممكن يوصلنا من شاشة صغيرة.
قلب أحمر ♥️ أو علامة لايك ازرق 👍 او ايموشن بيضحك 😂 او كلمة بسيطة في كومنت ممكن تخلي يومنا أحسن .. بس السؤال الحقيقي
هل دي طبطبة بجد؟ ولا مجرد أوهام رقمية بنضحك بيها على نفسنا؟
الطبطبة اللي كانت زمان بحضن وصوت دافي وكلمة صادقة اتحوّلت دلوقتي لإشعار بيقول “فلان عمل لايك” أو “فلان علّق على منشورك”
بقينا نقيس قيمتنا بعدد المتابعين ونقارن حبنا بعدد التفاعلات.
إدمان الإشعارات سعادة على جرعات 😏
عارف الإحساس لما الموبايل ينور بإشعار جديد؟
القلب يدق أسرع والدماغ يفرز “دوبامين” هرمون السعادة.
بس زي أي إدمان، الجرعة دي مبتكفيش!
ننزل بوست جديد ، نتصور أكتر ، نكتب كلام يلفت الانتباه…
والموضوع يتحول لدائرة مفرغة من البحث عن (الطبطبة الرقمية)
▪️الطبطبة اللحظية فرحه مؤقتة 💫
اللايك بيفرّح والكومنت يطبطب
بس بعدها؟
الفرحة بتروح بسرعة 😕
زي كباية عصير ساقع في عز الحر
تريحك لحظة وبعدين يرجع العطش أقوى.
نرجع ندوّر على نفس الاهتمام على نفس الإشعار اللي بيطمنك ان لسه في حد شايفك 👆
▪️ المقارنة القاتلة بتسرق السلام 🫨
الطبطبة دي مش بس مؤقتة دي كمان بتفتح باب المقارنة.
تشوف صورة حد في مكان شيك أو لبس غالي أو كلام رومانسي عن شريكه
تبتدى تسأل نفسك ليه أنا لأ ؟
وهنا بدل ما الإشعار يطبطب بيسرق منك سلامك الداخلي
▪️فجوة رغم القلوب الكتير 💔
آلاف القلوب ممكن تجيلك على صورة لكن في آخر اليوم تكتشف إنك لسه حاسس بالوحدة.
لأن الطبطبة الحقيقية عمرها ما كانت “إشعار”
هي كلمة من أمك
حضن من صاحبك
أو اهتمام صادق من شريك حياتك.
▪️امثلة من الحياة 💫
– ممكن بنت تنزل صورة وتفضل تعيد تحميل تشوف مين عمل لايك ولما العدد يقل تحس إنها وحيدة.
– شاب يكتب “أنا تعبان” بس علشان يشوف مين هيسأل عليه.
– زوجة تقارن صور بيتها بغيرها وتحس إنها أقل.
كل ده بيقول إننا بندوّر على الدفا في المكان الغلط.
طيب إزاي نرجع للطبطبة الحقيقية؟
١ – وزّع الكلمة الحلوة في حياتك اليومية
كلمة “بحبك” أو “موجود معاك” تفرق أكتر من ألف لايك.
٢ – اقعد مع اللي بتحبهم من غير موبايل
اللحظة دي هي الطبطبة الحقيقية.
٣️ – حب نفسك الأول
الطبطبة اللي منك ليك هي أساس كل طاقة حلوة.
٤️ – قلّل اعتمادك على التفاعل الافتراضي
صورتك مش مقياس لقيمتك قلبك هو المعيار الحقيقي.
أخيراً…
الطبطبة الرقمية شبه السكر الصناعي 🪄
شكلها حلو وطعمها سريع لكنها عمرها ما تشبع ولا تغذي.
الطبطبة الحقيقية
* لسه في الكلمة الطيبة
* في الحضن اللي من غير شروط
* في وجود حد جنبك مش علشان سيلفي لكن علشان بيحبك بجد.
ويمكن أهم طبطبة في حياتك …
هي اللي بتطبطب بيها على نفسك
وتفتكر إن قيمتك مش في عدد القلوب اللي على الشاشة لكن في قلبك اللي لسه بيعرف يحب بصدق ❤️❤️
خليك أنت أول مصدر طبطبة لنفسك والباقي هييجي لوحده 💪
