الرخص (إيه علاقته بالسعي على الرزق)
✍️ الإعلامية حنان جودة
من أصعب الصراعات اللي بنواجهها النهارده في مجتمعنا هو الصراع على الرزق، مش في السعي نفسه، لكن في الطريقة. بقى الرخص عنوان لمجموعة من الناس، مع الأسف، نسوا إن الله خلق الرزق، وخلق معاه القيم. السعي على الرزق عبادة، لكن لما يتحول لسرقة حلم، أو فكرة، أو كلمة، أو حق غيرنا، يبقى مش سعي… يبقى ظلم.
الله سبحانه وتعالى كرم الإنسان، ولم يرضَ له الرخص ولا الدونية ولا التعدي. قال تعالى:
﴿وَفِي السَّمَاءِ رِزْقُكُمْ وَمَا تُوعَدُونَ﴾
يعني الرزق مقسوم، مقدر، ومش محتاج نمد إيدنا على حق غيرنا علشان نوصل له.
ناس كتير نسيت إن الله لا يبارك في رزق جاي من ظلم، ولا في مال جاي من غدر. نسوا إن ربنا قسم الأرزاق بحكمة، وفرقها بعدل، وكل شيء عنده بقدر. وقال رسول الله ﷺ:
«إن روح القدس نفث في روعي أن نفسًا لن تموت حتى تستكمل رزقها وأجلها، فاتقوا الله وأجملوا في الطلب».
نصيحتي ليك: ما تنساش الله اللي يحيي ويميت، ويعطي ويمنع، وكل شيء بيده. المرض سبب، والفقر ابتلاء، لكن ظلم الإنسان لأخيه الإنسان جريمة. حرم الله القتال، فإزاي نقاتل بعضنا بسرقة أفكار وأحلام وأرزاق، ونسمي ده سعي؟ لا والله، ده حرام.
والحرام مهما كتر، نهايته وجع وخسارة. اللي بياكل حرام، الحرام بياكله.
يا رب ارفع الغشاوة والغفلة عن قلوبنا، وارجعنا لبعض، وارضنا بقضائك، واجبرنا جبرًا يتعجب منه أهل السماوات والأرض، يليق بعظمتك.
نحن الساعين، المجتهدين، الراضين، والمكافأة عندك يا رب.
