بقلم/ دعاء الجمل
مين اللى قال بكا عينى دم ف فرقتك وكلامى آه !؟
إفهم بقا
موتك حياة ✋
رب
أصل الألم من شِدته
بيخدر الإحساس معاه
زى القلم لما اتقسم
بقا كل نص بيتولد
وبيبتدى من منتهاه
بحرك غريق بيشدنى
وانا قلبى مكتوبله النجاة
إفهم بقا
موتك حياة✋
فاكر زمان ضعفى اللى كان
لاضم حنانه ف قسوتك
كان حابب انه يعيش جبان
علشان تحس بقوتك
ضلى يسيبنى ويسبقك
حالف يسنّد خطوتك
والدعوة تجرى وتلحقك
تبدر آياتها ف سكتك
دلوقتي آسفة لحضرتك
وشى اللى كان متخبى بان
شر الحليم لو تأمنه
هيجيله يوم يقلب شيطان
ويلاقى من جرحك دواه
دمعك ولا فارق معاه
حزنك يزود فرحته
حبك خلاص ماضى ورماه
وإن يوم تحن وتسأله
هيقول أكيد
موتك حياة✋
