الفوبيا خوف بس مش عادي
كتبت / سمر جرجس مرقص
اخصائية ارشاد نفسى و اسري و زواجى و تعديل سلوك
عضو اتحاد المعالجين النفسيين العرب
تخيل معايا إنك ماشي في شارع فاضي بالليل فجأة عدت من جنبك قطة سودا قلبك دق بسرعة جسمك اتجمد ، نفسك اتقطع ، وحسيت إنك لازم تجري تهرب!
طب لو قلتلك إن نفس الإحساس ده ممكن يعيشه حد وهو شايف فراشة أو واقف في أسانسير أو حتى بس بيفكر إنه يركب طيارة؟!
ساعتها تعرف إنك مش قدام خوف عادي إنت قدام فوبيا
الفوبيا مش مجرد خوف دي حالة بتسلبك حريتك وتحبسك في دايرة مقفولة: خوف مبالغ فيه + تجنب + قلق شديد. يعني عقلك بيقنعك إن اللي قدامك خطر قاتل حتى لو هو في الحقيقة أبسط من إنه يضر.
الفوبيا.. مش نوع واحد!
أنواع الفوبيا
١ – الفوبيا البسيطة
دي الأشهر والخوف بيكون من حاجة محددة زي
حيوانات : زي فوبيا الكلاب 🐕، القطط 🐈، العناكب 🕷️، أو حتى الفراشات 🦋.
طبيعة: زي الرعد والبرق ⛈️، المية 🌊، أو النار 🔥.
مواقف: زي ركوب طيارة ✈️، ركوب أسانسير، أو التواجد في أماكن عالية.
دم/حقن/جروح: الشخص يدوخ أو يغمى عليه لو شاف دم 🩸 أو سرنجة 💉.
٢- الفوبيا الاجتماعية
هنا الخوف مش من “شيء”، لكن من الناس ونظرتهم.
الشخص يخاف يتكلم قدام جمهور أو يتعرف على ناس جديدة، أو حتى ياكل في مطعم قدام غيره.
المخاوف بتكون من الفضيحة او النقد أو الإحراج
و ده ممكن يخلّي ناس كتير تنعزل وتفقد فرص شغل أو علاقات.
٣- فوبيا الأماكن المفتوحة أو المزدحمة
الشخص يخاف يكون في مكان مش هيعرف يخرج منه بسهولة.
زي المولات الكبيرة و المواصلات أو حتى شارع زحمة.
ساعات الخوف يوصل إن الشخص يفضل يفضل في البيت ويعزل نفسه تمامًا.
٤- فوبيا خاصة وغريبة شوية
فوبيا النوم
خوف من إنك تنام وتفقد السيطرة.
فوبيا الأرقام/الألوان
زي ناس بتخاف من رقم ١٣ أو من اللون الأسود.
فوبيا الأطباء أو المستشفيات
خوف من مجرد الدخول لمكان فيه علاج.
فوبيا الأصوات العالية
زي فرقعة البالونات أو الألعاب النارية.
طيب جسمك بيعمل إيه وقت الفوبيا؟
الموضوع مش هزار لان المخ بيبعت إِشارة خطر للجسم
القلب يدق بسرعة.
النفس يتسارع.
العضلات تتشد.
العرق ينزل.
والمخ يصرخ اهرب بسرعة!
يعني فعلياً الجسم بيتعامل مع الحاجة كأنها أسد طالعلك من الجبل حتى لو هي مجرد عصفورة واقفة على الشباك!
الفوبيا ليها جذور
١- تجارب قديمة
حد اتقفلت عليه مرة في أسانسير، يفضل طول عمره يهرب منه.
٢ – وراثة وجينات
لو في العيلة ناس عندهم قلق أو فوبيا، الاحتمال يزيد.
٢ – المخ نفسه
منطقة اللوزة الدماغية مسؤولة عن الخوف، ولو نشاطها عالي تبقى عرضة للفوبيا.
إيه اللي بيخلي الفوبيا خطر؟
مش بس الخوف اللي بيضايق لأ
الفوبيا بتخليك
١ – تمنع نفسك من شغل أو سفر (لو عندك فوبيا طيران).
٢ – تخسر صداقات (لو صحابك عندهم قطط وإنت عندك فوبيا منهم).
٣ – تعيش في قلق مستمر، خايف من مواجهة “الشيطان بتاعك”.
يعني باختصار، الفوبيا بتسجنك جوه نفسك.
طيب نخرج من السجن إزاي؟
الحلو هنا ان الفوبيا ليها علاج!
١ – العلاج المعرفي السلوكي (CBT)
بيساعدك تواجه مخاوفك خطوة بخطوة لحد ما تفقد قوتها.
٢ – التعرض التدريجي
تبدأ تشوف صور الحاجة اللي بتخوفك، بعدين فيديو، بعدين مواجهة صغيرة آمنة.
٣ – تمارين استرخاء وتنفس
تقلل القلق وقت المواجهة.
٤ – الأدوية
في بعض الحالات، الدكتور ممكن يوصف مضادات قلق لفترة.
الموضوع محتاج شجاعة وصبر بس النتيجة !! تحرر من مخاوفك
رسالة لكل اللي عنده فوبيا
لو إنت واحد من اللي بيعانوا متتكسفش إنت مش ضعيف إنت عندك “برنامج في المخ” محتاج يتعدل
والخوف اللي بيشلك مش دليل إنك مش قدها بالعكس مواجهتك ليه هتثبت قد إيه إنت قوي 💪
ولو إنت بتتعامل مع شخص عنده فوبيا بلاش تضحك أو تقلل من مشاعره او خوفه لان اللي بيخوفك إنت ممكن يقتله هو .
مد إيدك في إيده وساعده يواجه مشكلته بدل ما تحكم عليه.
أخيراً ..
الفوبيا هي مجرد كذبة ضخّمها عقلك وصدقها قلبك وجسمك.
والكذبة دي مش هتنكسر غير بخطوة واحدة هى انك تواجهها.
الخوف عمره ما بيختفي وإنت مستخبي ..
لكن أول ما تفتح الباب وتبص له في عينه تكتشف إن “الوحش” مكنش غير ظل
وساعتها تعرف ان إنت أقوى من وحش الفوبيا 💪
