مسافات الشفاء
كتبت لبني بدر
حافظ على وجود المسافات في حياتك ..المسافات فيها ” شِفاء “..
شفاء من كذا حاجة …
1_” التعلُّق “، كُتر التعمُّق في أي علاقة ..بيسبب تعلّق شديد .. وارتباط كبير بتضطّر من خلاله تسامح وتفوّت حاجات ما تتفوّتش …
2_” التنازُل ” ..لو انعدمت المسافات هتتنازل كتير و هتضعف قدّام أي رغبة جوّاك تخسّرك نفسك ..
3_” الإحترام ” لو الشخص اللى محيت معاه كل المسافات بينكم مكانش جدير بالإحترام .. لو مش كبير في نظر نفسه ونظرك هتفقدوا أهم معنى لأساس أي علاقة ..
4_العشم …حفظ المسافات بيقصّر الطرق المؤدية للعشم ..بيقطع جذوره من البداية ..
5-“العتاب” بيقلّ ؛ اللوم بيقلّ ..بتريح دماغك من أسئلة كتير و تفاصيل أكتر بتسببّ خلق نوع من القلق المؤذي لراحتك النفسية …
6_” المتاهة “… وجود المسافة بتحميك من الدخول في متاهة القرب ..والقرب لو زاد عن الحد …بتصنع منك حد هش قابل للكسر بسهولة ..
احرص على وجود مسافات بينك و بين أي حد يهمّك …هتحمي نفسك من الغرَق ؛ مش هتلاقي الإيد اللى تنقذك لو انسحبت روحك للسكّة الغلط …ولا هتكسب نفسك في تنازلاتك مع الشخص الغلط …
