في سؤال بيتكرر كتير عند الحوامل

تقريباً كل الحوامل بيعانوا من مشكلة الإمساك و بيكونوا مش عارفين إي السبب و خايفين ياخدوا أدوية

في الأول خلينا نفهم لي الإمساك بيزيد في الحمل أكتر

مع طبيعية الحمل بيحصل تغيرات كتيرة في الجسم و زيادة في حجم الرحم بتضغط على الأمعاء و ده بيخلي حركتها صعبة فبالتالي عملية الإخراج تكون صعبة و يحصل الإمساك و اللي ممكن مع الوقت يسبب بواسير خلال فترة الحمل

طب هل ممنوع تاخد أدوية للإمساك؟ أو فيها خطر على الجنين ؟

الحقيقة فيه أدوية بتكون آمنة في الحمل و بتجيب مفعول كويس و فيه أدوية ممنوعة تماماً

•فالأدوية اللي ينفع ناخدها حاجة زي Agiolax أكياس أو Colomucil أكياس

و بتتاخد مع كميات كبيرة من المية و بتدي مفعول في خلال يوم أو أكتر و دي حاجات طبيبعة فبتكون أول اختيار بالنسبة للحوامل

بعد كده ممكن حاجة زي Duphalac برده كويسة بس عموماً مش بنستخدمهم لفترة طويلة

•نيجي للحاجات اللي لازم نتجنبها ؛أولهم شربة الخروع لأنها ممكن تنزل الحمل لا قدر الله

و برده حاجة زي Minalax أو Laxine واللي ممكن يوصلوا لدم البيبي و بالتالي خطر عليه

طب في حلول بعيدة عن الأدوية ينفع نستعين بيها ؟

أكيد ….في أي حالة مرضية تخص الحمل لازم نحاول الأول نعالج من غير أدوية و الإمساك من أكتر الحاجات اللي ممكن نعمل فيها كده فمثلاً:

-تبدئي تزودي شرب السوايل خلال يومك

-تدخلي ألياف كتيرة في أكلك زي العدس و البقوليات عموماً وفواكه كتير

-تحاولي تعملي حركة خلال اليوم (بس في حدود المعقول عشان الحمل)

في الآخر خليكي في الآمن و استشيري طبيبك قبل أي أدوية إمساك أو أقرب صيدلي و استنينا