العنف النفسى …سلاح صامت يدمر الأرواح
بقلم د / سهير محمود عيد
فى كثير من البيوت بنسمع عن ضرب ، إهانات ، أو خلافات واضحة ، لكن فى نوع اخطر من العنف بيعدى من غير ما حد ياخد باله ‘ العنف النفسى ‘
هو السلاح الصامت اللى بيكسر الروح قبل الجسد ، وبيسيب جروح أعمق من أى كدمات .
العنف النفسى مش بس شتيمة أو تقليل من شأن ، لكن ممكن يكون تجاهل متعمد ، نظرة استهزاء ، أو حتى برود مشاعر مستمر .
الزوج الذى يتجاهل مشاعر زوجته ، الام اللى تفضل تقارن أولادها بغيرهم ، أو المدير اللى يقلل من قيمة موظف … ده كله عنف نفسى .
الخطورة فى النوع ده مفيهوش أدلة مرئية ، يعنى مفيش تقرير طبى يثبت كسر أو نزيف ، لكن الضحية تعيش نزيف داخلى مستمر : قلة ثقة بالنفس ، اكتئاب ، قلق وأحياناً رغبة فى الانعزال أو الانتحار .
الدراسات تقول إن اثار العنف النفسى ممكن تستمر لسنين طويلة ، وتظهر فى صورة عقد داخلية أو اضطرابات شخصية ، وده بيخلى الضحية فى دوامة صعبة جداً خصوصاً لو المجتمع حواليه مش معترف أن الكلمة ‘ الجارحة’ اخطر من الضربة .
الحل يبدأ من الوعى .. لازم نعلم أولادنا أن الإحترام مش رفاهية ، وان الكلمة الحلوة علاج ، بينما الإهانة سم بيدخل ببطء فى الروح . كمان مهم نفتح مساحات آمنة للضحايا عشان يتكلموا أو يطلبوا مساعدة من غير خوف .
فى النهاية الجروح الجسدية ممكن تلتئم مع الوقت ، لكن الجروح النفسية أو ما اتعالجتش بتفضل محفورة جوا الروح . خلينا نرجع نفسنا : هل ممكن نكون بنمارس عنف نفسى واحنا مش واخدين بالنا .
وأخيراً…. اللهم اجعل كلامنا طيباً ، وقلوبنا رحيمة ، واحفظنا من أن نكون سبباً فى أذى نفس أو كسر قلب .
