مش بنام ومش صاحي !
اضطراب النوم
بقلم / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
عضو التحالف العربي لخبراء العلاج النفسي
في لحظة هدوء بالليل والبيت كله ساكت تلاقيك نايم على السرير النور مطفي الموبايل بعيد وكل حاجة بتقول إن ده وقت النوم.
بس
🔹دماغك شغالة
🔹قلبك مشدود
🔹وعينك مفتوحة على الآخر كأنها بتسأل هو النوم نسي الطريق ولا إيه؟
خد بالك اضطراب النوم مش رفاهية ومش دلع ومش مجرد أرق وخلاص !!
ده حالة نفسية وجسدية بتدخل حياتك بهدوء وتسرق منك أبسط حق إنساني و هو الراحة
🔺اضطراب النوم ليه أشكال كتير
▪️في اللي مايعرفش ينام غير بعد الفجر
▪️وفي اللي ينام ويصحى كل ساعة
▪️وفي اللي ينام كتير بس يصحى مكسر كأنه ما نامش
▪️وفي اللي يترعب من فكرة النوم نفسها.
والمشكلة إن ناس كتير متعودة تقلل منه و نسمع كتير ( غمض عنيك ، إقفل دماغك ، إشرب ينسون)
وكأن الدماغ زرار بيتقفل وكأن القلق بيستأذن قبل ما يدخل
🔺أسباب اضطراب النوم
الحقيقة إن اضطراب النوم غالباً بيبقى عرض مش سبب و نتيجة لحجات كتير اهمها ..
١ – الضغط النفسي والتوتر المزمن
شغل، مسؤوليات، مشاكل، قلق على المستقبل الدماغ يفضل شغال حتى وإنت نايم.
٢ – القلق والاكتئاب
القلق يخليك صاحي مستني الأسوأ والاكتئاب يخليك نايم من غير راحة.
٣ – صدمات وتجارب قديمة
ناس كتير بتصحى بالليل من غير ما تفهم ليه، والسبب خوف متخزّن من زمان.
٤ – استخدام الموبايل قبل النوم
الضوء الأزرق بيضحك على المخ ويقوله «اصحى» حتى لو جسمك تعبان.
٥ – لخبطة مواعيد النوم
سهر طويل ، نوم متأخر ، قيلولة زيادة الساعة البيولوجية بتتلخبط.
٦ – الإفراط في المنبهات
قهوة ، شاي ، مشروبات طاقة بتفضل صاحي حتى بعد ما تبطل تحس بالتعب.
🔺طيب إيه العلاج؟
العلاج مش دايماً حباية.
أحياناً العلاج إنك تهدّى إيقاع حياتك و تتعلم تطمّن نفسك
🔺خدوا بالكم العلاج مش وصفة واحدة لكل الناس بس في خطوط أساسية و هى …
▪️أولا : العلاج النفسي
خصوصاً العلاج المعرفي السلوكي بيساعد يفك ارتباط السرير بالقلق، ويهدي الدماغ.
▪️ثانياً : تنظيم نمط الحياة
🔹 مواعيد نوم ثابتة
🔹 تقليل شاشة الموبايل قبل النوم
🔹 روتين هادي قبل النوم
▪️ ثالثا : التعامل مع السبب مش العرض
مش كل أرق يتحل بحباية
أحياناً محتاج ..
🔸تواجه خوف
🔸تحل مشكلة
🔸أو تطلع مشاعر مكبوتة
▪️رابعاً : تمارين تهدئة بسيطة
تنفس عميق ، استرخاء عضلي، دعاء او صلاة بسيطة أي حاجة تطمن الجهاز العصبي.
▪️خامساً : العلاج الدوائي (لو لزم)
وده بيكون تحت إشراف طبي ومش حل دائم لكن مساعد مؤقت.
🔺ولو اضطراب النوم استمر فترة طويلة أو بدأ يأثر على الشغل والعلاقات والحياة اليومية مهم جداً استشارة أخصائي نفسي أو طبي لأن التدخل بدري بيمنع المشكلة تكبر وتتعقد 🙏🏻
🔺خد بالك ان ..
🔹قلة النوم مش بس بتبوظ المزاج دي بتبوظ الذاكرة والتركيز والمناعة
🔹وبتخلّي الواحد عصبي و حساس و سريع الانفعال وأحيانا قاسي على نفسه وعلى اللي حواليه.
🔹و بتخلّيك تحس إنك عايش بنص طاقتك ونص روحك.
🔺 أوجع حاجة فى اضطراب النوم؟
إن الليل بيبقى وقت المواجهة.
كل اللي كنت هربان منه طول اليوم بيطلع 😥
ذكريات ، ندم ، اشتياق ، أسئلة ، خوف من بكرة وإنت بتواجه لوحدك للأسف
بس خليني أقولك حاجة مهمة قوي اضطراب النوم مش ضعف.ده رسالة ✉️
🔺رسالة من جسمك ونفسك بيقولولك
كفاية ضغط .. كفاية كتمان
في حاجة محتاجة تتشاف
🔺هل بعد كل ده النوم بيرجع؟
أيوه النوم بيرجع 💙
🔹بيرجع لما تحس بالأمان.
🔹بيرجع لما تتصالح مع نفسك.
🔹بيرجع لما تبطّل تحارب الليل وتبدأ تحتوي نفسك فيه
النهاية بقى اسمعني كويس ✨
لو إنت واحد من الناس اللى عندها اضطراب نوم
إوعى تصدّق إن ده قدرك
النوم مش بس غمضة عين
النوم راحة روح
وإنت تستاهل ترتاح
مش لازم تكون قوي طول الوقت مش لازم تفضل صاحي تحرس وجعك.
صدقنى لحظة لما تطبطب على نفسك بجد 🌿 الليل هيعدى والعين هتغمض
والروح أخيراً هتنام 💛💚
