مفاتيح السعادة الزوجية
بقلم / سمر جرجس مرقص
أخصائية إرشاد نفسي وأسري وزواجي وتعديل سلوك
عضو اتحاد المعالجين النفسيين العرب
عضو التحالف العربي لخبراء العلاج النفسي
مفيش بيت بيبقى سعيد من نفسه ومفيش بيت بيتهدّ فجأة.
لكن فى شروخ صغيرة بتحصل زى مثلاً …
كلمة اتقالت بالغلط ، سكوت اتكرر ، نظرة اتفسّرت غلط…
شروخ لو سبناها هتكبر مع الوقت و البيت يتهد و لو رممناها و صلحناها تبني البيت 🏡
وعلشان نفهم السعادة الزوجية صح لازم نرجع لأول طوبة اتحطّت بين اتنين ونسأل ..
بنيناها بكلام ولا بسكوت ؟
بحب ولا بعشم؟
السعادة الزوجية مش حظ
السعادة الزوجية فن و مفاتيح
واللي يعرف مفاتيحها يعيش مرتاح مهما الأيام كانت تقيلة 🥰
مفاتيح السعادة الزوجية
١- التواصل أساس كل علاقة ناجحة
أكبر غلطة إن كل طرف يفترض إن التاني “فاهم”
تصريحك باللى مضايقك شجاعة مش ضعف.
اختاروا جمل تقرّب…
زي أنا محتاج نفهم دي سوا
مش إنت عمرِك ما …
الجملة الأولى تبني
الجملة التانية تهدّ
٢ – اسمع
علشان نفهم مش علشان ننتصر
في ناس بتسمع نص الجملة وتبدأ هجوم.
وناس بتسمع كلمة مش عاجباها وتنسف الحوار كله.
لكن العلاقات اللي بتعيش هي اللي فيها حد بيسمع ويهمّه يفهم مش يفوز بالنقاش.
٣- الهدوء
الصوت العالي يعمل مسافة والمسافة لو كبرت تبقى جدار
الهدوء مش معناه تنازل
الهدوء معناه حكمة في اختيار اللحظة والطريقة والجملة الصح.
٤ – الشكر
الشكر مش كلمة… الشكر إحساس يوصل للروح.
الراجل اللي يسمع
متشكرة إنك سند .. يقوى
والست اللي تسمع
وجودِك بيهون .. تطمن
العلاقة اللي فيها تقدير ما تقعش بسهولة.
٥ – وقفة احترام قبل أي خلاف
اعملوا “استراحة احترام”
دقيقة ، خمس ، عشرة المهم إن الكلام ما يطلعش وإنت غضبان
الغضب أقوى من العقل
بس أضعف من دقيقة صمت.
٦ – توزيع المسؤوليات
العلاقة مش سباق مين بيتعب أكتر
العلاقة الزوجية شراكة
وكل طرف محتاج يعرف دوره بطريقة تريّح الاتنين مش تفيد واحد وتستنزف التاني.
٧ – الاحترام
حتى وإحنا زعلانين
الخلاف طبيعي لكن الإهانة مش طبيعية.
بلاش جملة تقلل او نظرة تكسر
ساعات الكسرة بتفضل سنين.
احترم حدود شريكك و مشاعره
٨ – خصصوا وقت ليكم
مع الشغل ، المسؤوليات ، التوتر
كل ده بينسي الناس بعض
خصصوا وقت بسيط يومياً لـ
مشروب مع بعض … خروجة صغيرة … كلمة دافية ♥️
٩ – التعبير عن الاحتياج
من غير خوف
“أنا محتاج / انا محتاجة…..
الاحتياج مش ضعف
الاحتياجات اللي نِسكت عنها تتحول لزعل والزعل يتحول لبُعد 🫷
١٠ – إقفلوا الماضي
كل علاقة فيها أخطاء.
لكن الناجحين هما اللي بيتعلموا مش اللي بيكرروا الجرح كل شوية.
١١ – الدعم وقت التعب
مش وقت الفرحة بس
الكل يعرف يحب و هى الدنيا حلوة.
لكن الدعم بيظهر في وقت التعب.
١٢ – الاحتواء قبل النصيحة
مش كل مشكلة محتاجة حل.
في مشاكل محتاجة قلب يسمع مش عقل يحلل.
قول لشريكك .. أنا معاك … كمل
الاحتواء أعمق من أي نصيحة.
أخيراً
السعادة الزوجية مش حلم ولا صدفة
السعادة الزوجية قرار 💚💛🩵
قرار نكمّل ، ونسمع ، ونسامح ، ونقرب حتى لما الدنيا تضيق
العلاقة عمرها ما بتنهار فجأة بتبدأ بشروخ صغيرة.
لكنها ممكن تترمم لو المفتاح في الإيد الصح.
والسر هنا 😉
مش إن الأيام سهلة السر إنك تفضل ماسك إيد شريكك حتى لو الطريق صعب ♥️♥️
