المقال الثاني من سلسلة فى بيتنا مراهق
كتبت / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
كل أم وأب في مرحلة المراهقة بيعيشوا لحظات صعبة… لحظات تحسي فيها إن ابنك بيتحول من طفل هادي لشخص عنيد ، بيرد ، بيتحدانا ، ومش بيسمع الكلام بس الحقيقة إنه مش بيحاربك و لا بيتحداك هو ببساطة بيحاول يلاقي نفسه ❤️
لو سألت أي أب أو أم ابنك المراهق بيضايقك في إيه؟
هتسمع إجابات شبه ..
عنيد وبيتحدانى
بيرد عليا ومش بيسمع الكلام
حاسس إنه عايش في عالم لوحده
لكن الحقيقة هو لا عنيد و لا بيتحداك
هو في مرحلة بيحاول فيها يثبت لنفسه إنه كبر 💪
في السن ده بيكون جواه صراع داخلي كبير
جزء بيقول ( أنا لسه محتاج ماما وبابا)
وجزء تاني بيصرخ ( أنا كبير ومش عايز حد يوجّهني)
وده اللي بيخليه يظهر قدامك بشكل “عنيد” أو “مستفز”
في المرحلة دي جسمه ومخه ومشاعره بتتغير بسرعة…
وهو نفسه ساعات مش فاهم اللي بيحصل جواه.
فبيتصرف تصرفات شكلها تحدي لكنها في العمق صرخة لإثبات ذاته
لو شفتي اللي ورا السلوك هتفهمي الرسالة
كل تصرف شكله تحدي وراه جملة بتقول لماما وبابا
«ادوني مساحة»
«صدقوا إني كبرت»
«اسمعوني مش توجهوني وبس»
أنواع العناد عند المراهقين
علشان نعرف نتعامل صح لازم نفرّق بين مستويات العناد
أ – العناد البسيط
رفض أو جدال علشان يثبت رأيه (وده طبيعي جداً )
ب – العناد المتوسط
النوع ده من العناد مش بسيط زي الجدال العابر لكنه كمان مش خطير أو خارج عن السيطرة.
هو عناد متكرر وملحوظ بيظهر في الحياة اليومية في مواقف صغيرة، لكن تأثيره بيتراكم ويعمل توتر مستمر في العلاقة بينك وبين ابنك.
صفات العناد المتوسط
١ – رفض أو جدال متكرر في الأمور اليومية (زي اللبس – المذاكرة …. )
٢ – محاولات مستمرة لفرض رأيه أو التهرب من توجيهاتك.
٣ – ردود كلامية فيها “تحدي خفيف” أو “رد ساخر” مش دايماً بقلة أدب لكن فيها إحساس “أنا مش عيل صغير ”
٤ – تكرار نفس السلوك حتى بعد التنبيه أو النقاش.
٥ – استخدام أساليب ضغط (زي الإلحاح او التجاهل أو الانسحاب)
ج – العناد العالي
تحدى مستمر + رفض تام لأي سلطة + نوبات غضب
(وده يحتاج تدخل متخصص أو جلسات إرشاد أسري)
مش كل عناد أزمة أحياناً بيكون مجرد وسيلة للتعبير عن الذات
أسباب العناد من وجهة نظر المراهق
علشان نفهمه صح محتاجين نسمع الكلام من جوه دماغه و هو بيقول 👌
“أنا حاسس ان محدش بيسمعني”
“ أنا عايز أحس إن ليا رأي”
“ لما أرفض أو أجادل يعنى انا موجود ”
لو فهمنا الدافع هنقدر نحتويه بدل ما ندخل معاه في صدام.
إزاي نمنع العناد من الأساس؟
في خطوات بسيطة تقدر تقلل جدًا من العناد وتمنع ان يزيد
١ – اتجنبي لغة الأوامر الحادة
( لازم – غصب عنك)
٢ – قدّمي اختيارات وخليه يحس إن له دور.
٣ – امدحيه لما يتعاون بدل اللوم على عدم التعاون.
التعامل الذكي مع العناد وقت حدوثه
لو رديتي على عناد ابنك بعناد بتدخلي معاه في معركة محدش فيها بيكسب.
لكن لو رديتي بتفهم وهدوء الرسالة بتوصل له من غير صدام.
نصائح سريعة
١- افصلي بين السلوك والشخص ( عناد المراهق مش هو شخصيته).
٢ – اسمعيه كويس قبل ما تردي.
٣- اعترفي بحقه إنه يكون له رأي.
٤ – وضّحي حدودك بهدوء من غير تهديد.
٥ – اختاري معاركك مش كل حاجة تستاهل خناقة
في النهاية
المراهق مش عدوك
هو ابنك اللي بيكبر قدامك وبيحاول يلاقي مكانه في الدنيا
احتويه بدل ما تعانديه اسمعيه بدل ما ترفعي صوتك عليه
العلاقة اللي تبنيها النهارده هتكون سندك بكرة ❤️
