عقل الرجل و قلب المرأه
بقلم / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
في سؤال بيطارد كل علاقة
ليه الراجل والست ساعات تحسهم جايين من عالمين مختلفين تماماً ؟
الراجل يقول …
هي بتزعل من حاجات مش مستاهلة !
والست تقول …
هو ليه مش حاسس بيا؟ ليه مش فاهمنى من غير ما أشرح؟!
والحقيقة البسيطة هى ..
إن لا الراجل غلط ولا الست غلط.
الحكاية كلها ان إحنا بس مختلفين ومش فاهمين بعض كفاية.
الموضوع مش عقدة ولا لغز ده ببساطة طبيعة مختلفةاو طريقة مخنا بيتعامل بيها مع الحياة و المشاعر والمسؤوليات.
أولاً.. الراجل
* الراجل بيتكلم بلغة “المنطق” مش “المشاعر” * الراجل بطبيعته بيدور على “الحل” أكتر ما بيدور على الكلام.
و الست مدايقة وبتحكيله هو بيسمع بس مخه بيشتغل
نحل ده إزاي؟ إيه الخطوات؟ إيه اللي المفروض أعمله
هو مش بيفرّق قوى بين الفضفضة و المشكلة
بالنسبة للرجل أي مشكلة = مهمة لازم تتصلّح و يكون ليها حل .
وعلشان كده ساعات الست تفهم ده إنه “برود” أو “قلة اهتمام”
لكن الحقيقة هو بيحاول يساعد بس بطريقته
* احتياج الرجل الاساسي
الاحترام – التقدير – الإحساس إنه مفيد و متقدر
لو حس إنه بيتهاجم بيتقفل.
ولو حس إنه مش قادر يرضي اللي قدامه بينسحب.
ثانياً .. المرأة
* المرأه مشاعرها مش ضعف مشاعرها جهاز استشعار
* المرأة عندها قدرة عالية جداً على ملاحظة التفاصيل.
بتشوف التعب في العين وبتسمع الزعل اللي ما اتقالش.
مش لإنها حساسة زيادة لكن طبيعة مخها إنه يربط كل حاجة ببعض
مثلاً .. المرأة بتربط الكلمة بنبرة الصوت ، بالحركة، باليوم كله.
* المرأه بتحب المشاركة ، الكلام، الحكي.
بتحس بالأمان لما تحس إن اللي قدامها “موجود معاها”
مش لازم يحل بس يسمع.
مش لازم يقول كلام كبير بس يحسّ بيها.
* احتياجها الأكبر
الأمان – الاحتواء – الثبات – الاحساس إنها مش لوحدها.
طيب ليه بنختلف؟
لاننا ببساطة احنا عكس بعض فى ردود افعالنا
الراجل لما يزعل … يسكت
الست لما تزعل … تعبر
الراجل لما يتوتر … يبعد شوية
الست لما تتوتر … تقرّب أكتر
الراجل يحب يُتقدَّر
الست تحب تتُفهَم
وده مش غلط ده معناه إننا محتاجين “نسمع” قبل ما “نحكم”
لما الراجل يسمع والست تفهم
أكتر علاقة بتنجح مش اللي فيها “راجل كامل” و”ست كاملة”
لاء …
العلاقة الناجحة اللي فيها اتنين واحد بيتعلم و يطور من نفسه ويسمع … وواحدة بتتعلم ما تفهمش السكوت على إنه بُعد.
ازاى نلاقى نقطة التقاء؟
لما الست تفهم إن سكوت الراجل مش بعد ده بس “بياخد وقته و يلملم نفسه”
ولما الراجل يفهم إن الست مش “مكبرة الموضوع” ده بس أسلوبها الطبيعى في التعبير
ساعتها العلاقة تهدى و تستقيم
خطوات بسيطة بس مفعولها كبير فى حياتنا ..
١ – اسمعوا قبل ما تفترضوا
٢ – فسّروا قبل ما تزعلوا
٣- اسألوا قبل ما تحكموا
متخليش اختلافاتكم تبقى سلاح خلوها أداة فهم
افتكر إن اللي قدامك مش ضدّك هو بس مختلف عنك.
اخيراً
مفيش راجل “مش بيحس”
ومفيش ست “مُعقّدة”
فيه اتنين اتربّوا واتشكّلوا واتصمموا بطبيعة مختلفة.
و طبيعى يكملوا بعض مش يبقوا نسخة من بعض !!
الاختلاف مش المشكلة…
المشكلة إن كل واحد مستني التاني يفكر زيه.
في آخر كل خلاف …
في آخر كل سوء تفاهم …
في آخر كل مرة بتحس إنكم مش فاهمين بعض…
افتكروا حاجة واحدة
الراجل والست مش مفروض يبقوا نسخة من بعض…
هما مفروض يبقوا اتنين بيفضّلوا بعض رغم الاختلاف.
ولما الاختلاف يتفهم العلاقة مش بس بتعيش دي بتكبر وتقوى وتبني اتنين ما يقعوش بسهولة ♥️♥️
