جرثومة المعدة: أعراضها وعلاجها
بقلم : سامي قمر
في حوار مع الدكتور محمد نور الدين، استشاري مناظير جهاز هضمي بمستشفيات مديرية الشؤون الصحية بالشرقية، تحدث عن جرثومة المعدة وأعراضها وعلاجها.
من هو الدكتور محمد نور الدين
الدكتور محمد نور الدين استشاري مناظير جهاز هضمي بمستشفيات مديرية الشؤون الصحية بالشرقية من مواليد محافظة الشرقية، محل الميلاد ههيا يقيم في ابو حماد شرقيه مواليد 10/7/1977 اقام 10 وحدات مناظير جهاز هضمي بمستشفيات مديريه الشؤون الصحيه بالشرقيه على اعلى مستوى مبادره علاج فيروس سي مبادره الاعتلال الكلوي مبادره الكشف عن الاورام ،
.ما هي جرثومة المعدة؟
قال الدكتور محمد نور الدين دى عبارة عن بكتريا تدخل الجسم عن طريق الاكل والشرب وتفضل عايشة جوه القناة الهضمية بتاعتك . بيسموها الميكروب الحلزونى او جرثومة المعدة ( H.pylori ) …
هل منتشرة بين الناس ولا محدودة فى ناس معينة ؟
منتشرة جدا بينا كلنا .. تخيل مثلا لو عددنا ٩٠ مليون فى ٦٠ مليون معرضين للإصابة بيها ( حوالين تلتين السكان ) ..
طيب هل تعمل قرحة مع كل الناس ؟
لا غالبا مش بتعمل مشاكل مع كل الناس لكن الناس اللى عندهم مشكلة فى المعدة زى التهاب هتعملهم قرحة …
كيفيه الاصابه بها ؟
بتدخل مع الأكل والشرب الأكل اللى مش نضيف او اللى مش مطبوخ كويس يعنى ني شوية ولذلك بتجي لمعظم الناس اللى بياكلوا من المطاعم خصوصا لو مطعم مش نضيف او الأكل مش مطبوخ كويس … الشرب طبعا اللى مش نضيف الماية اللي مليانه بكتريا
دكتور محمد ماذا يحدث للمعده بعد الاصابه ؟
ممكن تفضل سنين فى جسمك بدون مشاكل وطول الفترة دى واحدة واحدة تبدأ تهاجم بطانة المعدة والأمعاء وتعمل تآكل فيها زى جرح كده فلما المعدة بتاعتك تفرز حمض ال HCL اللى بيهضم الأكل يقوم يروح على المناطق المجروحة دى ويعمل قرحة معدة …
د محمد ما هي الاعراض التي ساشعر بها لو اصبت بالقرحه نتيجه الجرثومه ؟
هتلاقى عندك ألم فى بطنك ومعدتك فاضية وانت جعان ولما تاكل الألم يخف شويةويرجع يجى تانى بين الوجبات .. دايما عندك انتفاخات وغازات ..دايما عندك تكريع …
– هتحس بغثيان وممكن ارتجاع ..وزنك هيقل فجأة بدون سبب …ظهور اعراض القولون العصبي
ما هي العلامات الخطيره اللى اخاف منها ؟
لو فى دم فى الموضوع سواء دم فى البراز احمر او البراز لونه اسود او لو رجعت دم او لو الالم على طول مش بيروح او حاسس بتعب شديد وتوهان ..
كيفيه التاكد ان عندى جرثومة المعدة ؟
باالتحاليل اعمل تحليل Ag فى البراز ودا افضلهم وادق او الطريقة التانية بالمنظار ..
ماذا لو تاكدت ان الجرثومه موجوده عندي ما هو العلاج
غالبا العلاج بيكون ١٤ يوم وتحت اشراف طبيب بتبدأى بالعلاج الثلاثى ..بانتابرازول ٤٠ مجم حبة قبل الفطار وقبل العشاء مترونيدازول ٥٠٠ مجم صباحا ومساءا بعد الاكلكلارثرومايسين ٥٠٠ مجم صباحا ومساءا بعد الأكل ثم بعد ذلك كمل ١٤ يوم بنفس الجرعات بعد كده كمل علي بانتابرازول لمده شهر ..وفيه حبوب العلاج الحديث ترايجستكير ايضا لعلاج الجرثومه وممتازة
امتى اعمل تحليل اتأكد اني شفيت من الجرثومه؟
بعد شهر من العلاج ..
طيب هل فى ادوية بتأثر على نتيجة التحليل ؟
ايوه المضاد الحيوى لو بتاخده وذهبت عملت تحليل هيطلع سالب عشان كده قبل ماتذهب للمعمل لازم توقف المضاد الحيوى اسبوعين على الاقل…
إزاى احمى نفسى واولادى من جرثومة المعدة
النظافة ثم النظافة ثم النظافة .لما تدخل الحمام اغسل ايدك كويس وانت خارج ..قبل ماتاكل اغسل ايدك كويس …الاكل يستوى كويس بلاش أكل نى وبلاش اكل مطاعم ..بلاش عصبية او ضغط عصبى او تدخين …
ما نوعيه الاكل اللى ياكله مريض جرثومة المعدة ؟
الصبح حليب بالعسل او ميه بالعسل على الريق ..وجبتك يكون فيها خضروات وفواكة وحبوب كاملة .بالليل عشاء خفيف فيه علبة زبادى …بلاش تاكل كتير مرة واحدة وكل وجبات صغيرة اكتر من مرة ..بلاش فواكة حمضية زى الليمون واليوسفى والبرتقال ..بلاش مقليات بزيادة او اكل مسبك بزيادة وملان دهون ..بلاش بهارات او حراق بزيادة بلاش شاى او قهوة خصوصا علي معدة فاضية
في نهايه الحوار تتقدم جريده الاسبوع العرب نيوزبالشكر لحضرتك يا دكتور محمد علي هذه المعلومات الطبيه ونتمني ان تكون معنا دائما لمساعده المرضي ودائما وابدا الوقايه خير من العلاج
