“اللي في الصورة مش الحقيقة!”
متابعه سعديه الشيبانى
ذوي الإعاقة في مصر بيعيشوا أصعب فتراتهم والمشكلة مش في التعب…
المشكلة في اللي بيكذّب تعبهم بصورتين وكلمتين!
ـ
الناس شايفة إننا “أخدنا حقنا وزيادة” علشان لقطة في مؤتمر وابتسامة في تقرير وكلام محفوظ بيتقال كل سنة!
بس الحقيقة؟ إحنا مش بخير إحنا بنصارع علشان أبسط حقوقنا:
بطاقة الخدمات؟
ناس بقالها سنين بتجري ومفيش نتيجة!
التأهيل والكرامة؟
حق بيتحول لتوسل ومش كل اللي يستحق بياخد!
التعيين؟
قانون بيتكسر قدام المصالح والـ 5% بقت “ديكور”!
المواصلات؟
رحلة عذاب يومي… علشان الشوارع مش مهيأه!
عربيات المعاقين؟
اتحجزت واتبهديت لمجرد إن مالهمش ضهر!
العلاج؟
لسه بنستنى تعميم التأمين الصحي الشامل ومفيش بديل حقيقي… واللي محتاج يتعالج بيختار بين قوته وبين صحته!
والمجتمع؟
ساكت اتضحك عليه وافتكر إن الصورة بتعبر عن الواقع!
لكن لا إحنا بنغرق في صمت قاسي وبنصرخ من جوه ومفيش ودن بتسمع!
لو قلبك صاحي ولسه فيك إحساس شارك الكلام ده واكسر حيطان التجميل الكدابة!
إحنا مش بنطلب شفقة إحنا بننادي بحق!
