الاكتئاب مش دايماً نفسي
بقلم / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
عضو التحالف العربي لخبراء العلاج النفسي
( مش كل اكتئاب محتاج علاج نفسي أحياناً محتاج شمس)
جملة يمكن تستفزك بس اسألي نفسك ؟!!
كم مرة حسيتي بتعب او حزن او عصبية أو فقدان شغف ومن غير سبب واضح
بتصحي تعبانة من غير سبب؟
بتعيطي فجأة؟
حاسّة إنك مش طايقة نفسك ولا اللي حواليك؟
قبل ما تلومي نفسك اسألي جسمك؟؟
الحقيقة أبسط وأخطر
أحياناً الوجع اللي في النفس بيبدأ من نقص فيتامين بسيط في الجسم زي فيتامين (د)
الغريب إن فيتامين بسيط زي فيتامين (د) اللي ناس كتير فاكرينه بيوجع العضم وخلاص
ممكن يكون ليه تأثير كبير جداً على نفسيتك ، مزاجك وطريقتك في التفكير
فيتامين (د) مش رفاهية فيتامين (د) له دور أساسي في:
🔺كيميا المخ
🔺تنظيم المزاج
🔺إنتاج هرمونات السعادة
🔺توازن الجهاز العصبي
يعني باختصار ..
لو ناقص نفسيتك هتتأثر حتى لو حياتك من بره شكلها تمام
🔹طيب نقص فيتامين (د) يعمل إيه؟
🔺أبحاث كتير ربطت بين نقص فيتامين (د) وظهور أو زيادة
– الاكتئاب
– الحزن المستمر
– فقدان الشغف
– العصبية وتقلب المزاج
– الإحساس بالإرهاق النفسي بدون سبب واضح
مش معنى كده إن فيتامين (د) “بيسبب” الاكتئاب بشكل مباشر لكن نقصه بيخلي المخ أضعف في مواجهة الضغوط وبيخلّي المشاعر السلبية تقعد أطول وتبقى أعمق.
🔹نقص فيتامين (د) والفصام؟
خلينا نكون واضحين ومنصفين:
نقص فيتامين (د) مش سبب مباشر للفصام لكن الدراسات بتشير إنه ممكن يكون عامل مساعد أو محفّز لظهور الأعراض
عند الأشخاص اللي عندهم استعداد وراثي
يعني إيه؟
يعني في شخص عنده قابلية وجسمه ناقص فيتامين وتوتر عالي مع ضغوط مستمرة…
الأعراض تظهر أسرع وبحدة أكبر.
🔺الدايت القاسي عدو النفسية
في نقطة خطيرة بنشوفها كتير ..
ناس بتعمل دايت قاسي
تمنع أكل ، تقلل دهون ، وتحبس نفسها في البيت من غير شمس و من غير توازن غذائي.
النتيجة؟
يحصل خلل في الفيتامينات و على رأسهم فيتامين (د) وبعدها ..
▪️ اكتئاب
▪️ عصبية
▪️ نوبات بكاء
▪️ إحساس بالفراغ
وساعتها يفتكروا إنهم ضعاف نفسياً بس الحقيقة إن الجسم هو اللي منهك.
🔹الحمل ونقص فيتامين (د)
الأم اللي عندها نقص فيتامين (د) أثناء الحمل…
🔺بتتعب نفسيا أكتر
🔺مزاجها بيبقى متقلب
🔺وبتدخل في اكتئاب حملي أو بعد الولادة بسهولة
كمان الجنين بيتأثر ومع عوامل تانية (وراثية وبيئية) النقص الشديد والمستمر ممكن يزود احتمالات بعض الاضطرابات النمائية مستقبلا
وده مش تهويل ده وعي
طب الحل إيه؟
الحل مش معقد بس محتاج وعى
١ – تحليل بسيط
٢ – شمس بانتظام
٣ – أكل متوازن
٤- ومكمّلات تحت إشراف طبي
وأهم حاجة ..
ما تستهونيش بتعبك النفسي بس كمان ما تفصليهوش عن جسمك.
أخيراً..
مش كل تعب نفسي سببه علاقة فاشلة ولا صدمة قديمة ولا شخصية ضعيفة.
أحياناً
الجسم ناقصه فيتامين فالنفس بتقع.
لو حاسة إنك تعبانه ومش فاهمه ليه ابدأى بخطوة بسيطة .. و هى تحليل فيتامين (د)
يمكن تكتشف إن الحل أقرب مما تتخيلى
و خليكى فاكرة ان علاج النفسية مش دايماً يبدأ بالكلام أحياناً يبدأ بالشمس
و كلمة ليكى من قلبي ♥️
خدي بالك من نفسك زي ما بتاخدي بالك من كل اللى حواليكى .. نفسك ليها عليكى حق ✨
