سحر الكلمة الطيبة
بقلم / سهير محمود عيد
الكلمة الطيبة مش مجرد حروف… دي قوة خفية تقدر تغيّر حياة إنسان في لحظة. كلمة واحدة ممكن ترفع معنويات حد كان بيقع، وتعدل مزاج شخص مكسور، وتطفي نار جوا قلب حد كان بيمر بأسوأ يوم في حياته. الكلمة الطيبة روح، والأرواح بتتلاقى في المعنى الحلو قبل الصوت.
في زمن بقى القسوة رد فعل أسرع من السلام، والكلام الجارح أسهل من الاعتذار، فضلت الكلمة الطيبة واقفة لوحدها… قليلة، لكنها مؤثرة. وده سر جمالها: إنها نادرة، وعشان كده قيمتها غالية.
الإنسان أوقات كتير مش محتاج معجزة ولا نقاش طويل. محتاج كلمة بسيطة:
“قدّها”… “ربنا معاك”… “أنا مصدّقاك”… “هتعدّي”.
جملة صغيرة، بس قادرة ترد روح كاملة.
الكلمة الطيبة زي زرع، تزرعيه النهارده ويطرح خير عمره ما يخلص. ربنا سبحانه وتعالى شبّهها بالشجرة الطيبة: ثابتة، أصلها خير، وثمارها ما بتتقطعش. يعني كل كلمة حلوة بتسيبيها في طريقك، بتفضل ماشية مع اللي سمعها… تهوّن عليه، وتطبطب، وتصلّح، وتفتح باب جديد.
يمكن كلمة منك تصلح علاقة كانت بتضيع، أو ترجع ابتسامة لشخص ناسي شكله وهو مبسوط، أو توقف خناقة، أو تمنع سوء ظن… أو تبني جسر مكان جرح .
حتى نفسك تستاهل كلمة طيبة منك.
احكي لنفسك كلام يشجّعك، يهديك، يطمنك . قولي :
“أنا قوية”… “أنا أستاهل الخير”… “ربنا كاتب لي الأحسن”.
الكلمة الطيبة اللي بتوجّهيها لنفسك بتبني فيكي ثقة… وطمأنينة… ورضا حقيقي.
والأجمل إن الكلمة الطيبة مش محتاجة مجهود ، ولا وقت ، ولا فلوس ، ولا تخطيط .
لكن أثرها… كبير.
بتغيّر يوم ، وتغيّر شعور ، ويمكن تغيّر حياة .
فخلي لسانك دايمًا خفيف على الخير ، تقيل على الأذى .
خلي كلامك نور بدل ما يكون نار .
خلي وجودك رحمة … صوت يهوّن … كلمة تشيل … وأثر يفضل.
الكلمة الطيبة… سحر .
وسحرها كله خير .
وأخيراً …..
اللهم اجعل ألسنتنا عامرة بالطيب من القول ، واجعل كلماتنا نورًا يملأ القلوب سكينة ، واغمرنا بحلاوة الكلام الصالح ، وارزقنا حكمة الكلمة وصدق النية ، واجعل قولنا سببًا للخير ، ولراحة من نحب ، ولرضاك عنا يا رب العالمين . اللهم آمين .
