الغرور طريق قصير ينتهى بخيبة أمل
بقلم / طلبه عبدالكريم الجازوى
الغرور مش قوة زى ما بيتهيأ للبعض من الناس ولكن الغرور صفة الانسان الضعيف…
بس لابس قناع كبير.
الإنسان المغرور دايمًا فاكر نفسه أعلى من الناس،
لكنه في الحقيقة خايف يتشاف على حقيقته والناس تعرف أنه فاضى من جوة انسان ضعيف بكل ما تحمله معانى الكلمه
خايف حد يكتشف إنه مش قد الصورة اللي بيرسمها.
الغرور يخليك تخسر ناس بتحبك،
وتبعد عنك قلوب كانت صافية ليك فى يوم من الايام
الغرور يخليك واقف لوحدك فوق جبل…
بس جبل من وهم نهايته السقوط
الانسان المغرور يظن إن العالم محتاج له،
مغرور وناسى نفسه لكن للعلم
الدنيا بتمشي من غير اى حد والحياه مش بتقف على حد
والعمر ما بيعوّضش حد فقد احترامه بين الناس.
القوي الحقيقي مش اللي يمشي متعالي على الناس ولا يتكبر على أحد
القوي الحقيقى هو اللي قلبه كبير،
وعقله رايق،
ولسانه مهذب،
ومعرفته بنفسه أكبر من إنه يتكبر على خلق الله
الغرور طريقه قصير جدا جدا …
ينتهي بخيبة.
أما التواضع طريق أطول يوصل للقلوب ويثبت فالزمن ومحدش ينسى صاحبه
الى كل من نسى نفسه وغرته الدنيا والايام احذر من الغرور لان اول خطوة فيه بتكون فوق الناس
وآخر خطوة… بتكون فوق نفسك
كفانا الله وإياكم شر الغرور
