الأكتئاب المبتسم
حزن يختبئ خلف ابتسامة فلا تخدعك الوجوه!!
بقلم / سمر جرجس مرقص
اخصائية ارشاد نفسى و اسري و زواجى و تعديل سلوك.
عضو إتحاد المعالجين النفسيين العرب
في زمن السوشيال ميديا والضحك الإجباري بقى في ناس كتير عايشة ورا ابتسامة شكلها حلو لكن جواها وجع كبير.
الناس دي مش ضعيفة ولا بتمثل .. للاسف الناس دول بيحاربوا في معركة نفسية كل يوم من غير صوت 😒
الحالة دى اسمها الاكتئاب المبتسم
وده من أخطر أنواع الاكتئاب لأنه صامت ومخادع في نفس الوقت
فى الواقع ان أخطر وجع مش اللي بنشوفه لكن اللي مستخبي ورا ضحكة شكلها مطمنة 😂
في ناس حواليك ممكن يبانوا (قمرات) في الضحك والهزار بس جواهم حرب نفسية محدش سامعها ولا حاسس بيها.
يضحكوا في وش الناس وفي نفس اللحظة قلبهم بيتقطع جواهم.
لو بصيت حواليك ممكن تلاقي ناس شكلهم ناجحين ، بيتفاعلوا ، بيهزروا ، بيبان إن حياتهم مستقرة ،
لكن الحقيقة إن جواهم معركة تقيلة جداً محدش شايفها.
وده بالظبط معنى الاكتئاب المبتسم أو الاكتئاب الخفي
طيب ليه اسمه مبتسم؟
لأن صاحبه مش بيبان عليه العلامات اللي الناس متعودة تشوفها مع الاكتئاب يعنى
مش منطوي ، ولا نايم طول اليوم، ولا بيعيط.
بالعكس ممكن تلاقيه بيروح شغله، بينجز ، بيضحك ، وبيدي طاقة للناس اللى حواليه 🫥
لكن جواه في صراع صامت بيستهلكه يوميا
و للاسف اللي حواليه بيصدقوا المظاهر ومحدش بيسأله بجد إنت عامل إية؟
وده اللي بيخلي الألم يزيد أكتر.
طيب ايه العلامات اللي ممكن تكشف الاكتئاب المبتسم ؟
للاسف الأعراض مش دايماً واضحة بس في شوية علامات خفية 🤔
١. إرهاق داخلي مستمر
بيحس إنه بيمثل طول الوقت وبيجهد نفسه عشان يبان طبيعي.
٢. تفكير سوداوي
رغم الضحك جواه أفكار سلبية أو حتى انتحارية أحياناً .
٣. ضغط عصبي شديد
مش بيبان قوي قدام الناس لكن بينه وبين نفسه بينهار.
٤. قلة تقدير الذات
بيجلد نفسه حتى لو ناجح ومحبوب.
٥. فقدان الشغف
بيكمل واجباته بس من غير إحساس بأي متعة أو معنى.
بالظبط زي واحد لابس قناع الناس شايفاه مبتسم، بس الحقيقة إنه بيصرخ جوا نفسه.
ليه الناس بتخفي اكتئابها؟
١. الخوف من الأحكام
في مجتمعاتنا لسه كلمة “مكتئب” بتتفهم إنها ضعف أو قلة إيمان.
٢. المسئوليات
في ناس شايلة بيت أو أولاد ومش قادرة تبين إنها منهارة.
٣. الحفاظ على الصورة
خايفين الناس “تشمت” أو يفتكروا إنهم فشلوا.
٤. الإنكار
أحياناً الشخص نفسه مش عايز يعترف فيحط ابتسامة على وشه كإنها درع بتحميه.
الاكتئاب المبتسم خطورته في الصمت
الخطير في الاكتئاب المبتسم إنه بيمشي من غير ما حد ياخد باله.
صاحبه مش بيطلب مساعدة وده يخليه يوصل لمرحلة خطيرة جداً .
كتير من حالات الانتحار كانت لأشخاص شكلهم “كويس” ومبسوطين قدام الناس لكن الحقيقة كانت صعبة ومؤلمة من جوا.
طيب نقدر نعمل إيه؟
١. اسمعوا بجد
اسألوا اللي بتحبوهم إنت عامل إيه بجد؟
واسمعوا الإجابة من غير حكم ولا نصيحة سريعة.
٢. خليك حساس للتفاصيل
ساعات كلمة زي “مافيش حاجة مفرحاني” بتتقال بهزار لكنها صرخة داخليه .
٣. كسر وصمة العيب
العلاج النفسي مش ضعف ده شجاعة وإنقاذ روح.
٤. اطلب مساعدة
لو حاسس إنك بتنهار رغم ابتسامتك متخافش تروح لمعالج نفسي.
خطوة صغيرة ممكن تغير حياتك.
٥. احتوي مش دايماً تنصح
أوقات اللي قدامك مش محتاج حل محتاج بس كلمة “أنا جنبك”.
أخيراً..
الاكتئاب المبتسم مش “مزاج وحش” ولا “دلع”
ده وجع حقيقي بياكل في روح صاحبه من غير ما يسيب أثر 😞
وكل مرة نصدق الضحكة من غير ما نسأل عن الوجع اللي وراها ممكن نخسر حد غالي من غير ما نعرف.
خلي بالك كلمة صغيرة منك زي “إنت مش لوحدك” ممكن تبقى طوق نجاة لحد بيغرق في صمته.
يمكن الضحكة اللي قدامك مش حقيقة بس اهتمامك بيها ممكن ينقذ حياة انسان 💔
