لغة الجسد ….حديث بلا كلمات
بقلم د/ سهير محمود عيد
استشارى الصحة النفسية والإرشاد الأسرى
وعضو فى اتحاد المعالجين النفسيين العرب
فى حياتنا اليومية ، كل واحد فينا بيتكلم بلغتين . لغة الكلام ولغة الجسد الأولى بنسمعها والتانية بنشوفها ونحسها ، وكثيراً بتبقى أصدق من الكلمات .
تخيل مثلاً انك قابلت صديق قديم وقالك بإبتسامة ” مبسوط جداً انى شوفتك ” لكن أيده المتشابكة قدام صدره ، وصوته التردد ، ونظراته القصيرة بعيداً عن عينيك ، كلها تبعث رسالة مختلفة ، هو مش مرتاح اوى . هنا الجسد قال الحقيقة اللى اللسان حاول يخفيها .
وفى الكافيه لما حد يتأخر عن ميعاد ممكن يقول أنا آسف على التأخير لكن لو لقيته طول القعدة بيلعب فى الموبايل ومش مركز حتعرف أن باله مشغول بحاجة تانية ٠ ومش حاضر معاك بقلبه .
حتى فى الشغل تقدر تكشف نوايا اللى قدامك من غير ما ينطق ، زميلتك اللى بتضحك لكن رجليها متجهة ناحية الباب معناها أنها مستعجلة وعايزة تمشى ، والمدير اللى بيبصلك بثبات من غير ما يرمش كثيراً غالباً بيختبر ثقتك بنفسك .
الأطفال كمان عباقرة فى لغة الجسد . طفل ماسك إيد مامته بقوة كأنه يقول لها ” أنا محتاج أمانك ” ، وآخر بيخبى وشه فى حضن أبوه ليعلن خوفه من العالم من غير ما ينطق بكلمة .
المثير فى الموضوع إننا ساعات لنفهم بعض أكثر من خلال الصمت .
كلمة ” كويس ” مش دايما بتعنى الراحة ، لكن الكتف المنحنى ، والأنفاس الثقيلة ممكن يقولوا العكس .
إدراكنا للغة الجسد مش بس بيساعدنا نفهم اللى حوالينا ، لكنه كمان بيساعدنا نفهم نفسنا ، إزاى بنقف ؟ إزاى بنضحك ؟ إزاى عيوننا بتتحرك ؟ كلها رسائل ترسلها من غير ما نشعر .
فى النهاية … تذكر أن لغة الجسد زى المرآة تعكس ما بداخلنا من مشاعر حقيقة فكن يقظاً ….. فالعين قد تخفي الكلمات لكن الجسد دوماً يبوح بالصدق .
