رهف لا تكذب أبدا
من سلسلة يوم من يوميات رهف
بقلم/ أمل فؤاد
مديرة لجنة الطفل والأمومة
جريده مصر اليوم نيوز شمال سيناء العريش
ذهبت رهف إلى حديقة البيت تلعب مع الفراشات ولكن فجأة وهي تلعب أخطأت وداست على الزهور الجميلة اللي مامتها زرعاها فخافت رهف جداً من مامتها لأن مامتها موصياها متقربش منهم وتحافظ عليهم.
وقالت في نفسها مش عارفه أقول إيه لماما لو قلت لها هتزعل مني جداً وتغضب.
فأنا هقول إن الكلب بندق هو اللي بيحفر ويدور على العظمة هو اللي كسر الورود.
فكرت رهف ورجعت في نفسها تقول وإيه ذنب الكلب هو ده اللي بيحرس الحديقة ولو ماما عرفت هتمشيه من الحديقة وانا بحبه جداً.
طيب ممكن أقول لها إيه؟
آه هقول لها إن جارنا عمر وهو اللي جه ولعب وداس على الزهور لأنه شقي جداً ومشاكس.
بس رجعت رهف في نفسها وقالت وإيه ذنبه ممكن ماما تزعق ليه وهو ملوش ذنب .
رجعت رهف تفكر تاني قالت خلاص أنا قررت إني أقول لماما إن العاصفة اللي جت هي اللي كسرت الزهور وبكدة ماما مش هتقول حاجة.
وفعلاً رهف راحت لمامتها ووقفت قدام مامتها وافتكرت حاجة مهمة جداً وهي إن مامتها ربتها على الصدق وإنها ما تكذبش أبداً حتى لو غلطت.
وقفت رهف وحكت لمامتها اللي حصل .
وقالت لها مامتها شاطرة يا رهف مهما تكون العقوبة ما تكذبيش أبداً لأن يا رهف من صفات رسولنا الكريم عليه أفضل الصلاة والسلام قول الصدق ونهى عن الكذب.
انتظرونا في يوم جديد من يوميات رهف.
