مشاعرنا المكسوفة
ليه بنتكسف نُظهر اللى فى قلبنا؟
بقلم / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
عضو التحالف العربي لخبراء العلاج النفسي
حسّيت قبل كده إنك بتختنق و موجوع و مش قادر تقول إنك موجوع؟
عارف ده بيحصل ليه !! هقولك
اصل المشاعر لما تتخنق بتسكت.
ولما تسكت بتتكسف.
وإحنا جيل اتربّى إنه يكتم مشاعره لحد ما بقى بيتكسف يعترف حتى لنفسه إنه موجوع.
إحنا في مجتمعات اتربينا فيها على إن “المشاعر ضعف” وإن اللي يعيط أو يقول “أنا محتاجك” يبقى مش قوي كفاية.
كبرنا على عبارات زي ..
▪️”الولد ما يعيطش”
▪️”البنت المحترمة متضحكش بصوت عالي”
▪️ “ما تعبرش عن نفسك علشان ما يتمسكش عليك كلام”
والنتيجة؟
بقينا جيل عنده مشاعر اه بس مكسوف منها.
يعني إيه مشاعر مكسوفة؟
يعنى الاحساس اللى موجود بس محبوس
يعنى ..
تبقى زعلان وتضحك.
تبقى محتاج طبطبة وتقول “أنا تمام”
تبقى عايز تقول لحد “أنا بحبك” بس تبلع الكلمة في آخر لحظة
المشكلة مش إن المشاعر مش موجودة المشكلة إنها متكتفة بقيود العيب والخوف من الرفض.
طب ليه بنتكسف من مشاعرنا؟
١ – التربية
اتعودنا من صغرنا اننا نخبي دموعنا ونبلع غضبنا.
٢ – الخوف من الحكم
خايف تقول “أنا موجوع” يتقال عليك ضعيف.
٣ – التجارب القديمة
يمكن عبّرت قبل كده واتقابلت بالسخرية أو التجاهل.
٤ – ثقافة “خليك قوي”
كأن القوة معناها تبقى حجر
و فى امثلة بنعيشها كل يوم زى مثلاً …
▪️البنت اللي نفسها تقول لمامتها
” أنا محتاجة حضنك” بس تفضل ساكتة عشان متعودتش تعبر.
▪️الشاب اللي بيحب زميلته وكل مرة يقرر يقولها ميقدرش يعبر عن مشاعره فيبتسم فى صمت
▪️الزوجة اللي بتحس بالزعل من جوزها بس بدل ما تقوله عن مشاعرها للاسف بتكمّل اليوم بوش بارد.
المشاعر المكسوفة مش بتختفي بتتراكم ، وتتحول لثقل في القلب أو مرض في الجسد.
خطورة كبت المشاعر …
١ – توتر وقلق
الإحساس اللي مش طالع لبّره بيتحوّل لطاقة سلبية.
٢ – اكتئاب
تراكم المشاعر المكسوفة بيخليك حاسس بالفراغ.
٣ – تباعد العلاقات
الناس حواليك مش هتعرف إنت محتاج إيه لو فضلت ساكت.
٤ – فقدان تدريجى لنفسك
لانك مش عارف بتحس بأية
طيب تعالوا نعرف إزاي نتصالح مع مشاعرنا؟
١ – اعترف لنفسك الأول
لو زعلان قول لنفسك “أنا زعلان” مش لازم تنكر.
٢ – جرّب تكتب
الكتابة بتكسر جدار الكتمان.
٣ – شارك حد امين يفهم مشاعرك
شخص يسمعك بجد
٤ – مارس التعبير تدريجياً
قول كلمة بسيطة زي “وحشتني” أو “مضايق” لحد قريب منك.
٥ – فك العقدة مع نفسك
افتكر إن التعبير عن المشاعر مش ضعف ده إنسانية.
أخيراً…
لازم تعرف ان المشاعر اللي بنتكسف نبوح بيها بتفضل جوانا زي المية الراكدة تبان ساكنة بس مليانة تعب و وجع من جوه.
لو اتعلمنا نطبطب على قلوبنا ونسمح لمشاعرنا تاخد حقها في الظهور، هنكتشف إن القوة مش في الكتمان.. القوة في الصدق.
ويمكن اهم و أجمل جملة محتاجين نسمعها …
إنت من حقك تحس ومن حقك تعبر 💚💛💙
