……….طيب ولكن……….

قصيدة باللغه العاميه المصريه

(طيب ولكن)

بقلم امينه حمايه

انا مش ساذج ولاقلبى غشيم
اتعلمت بس اكون صافى ولو الجرح أليم
بتعامل بنيه صافيه ووشى دايما مريح
اخبى وجعى جوايا واضحك وغيرى يطيح
بيقولوا الطيبه ضعف في زمن الكل لئيم
كل ما احسن النيه ارجع بعذاب وأنين
فاهم كل حاجه وساكت مش ضعيف
لا بحب اللف والدوران ولى بس فى الكلام الصريح
واللى شايف طيبتى سذاجه يبقى لسه مشافش كتير
ده الطيب لو زعل يقلب إعصار كبير

الطيبه مش عيب ولا يوم كانت هوان
دى قوة جوه الروح مش كل الناس ليها عنوان

اتوجعت من ناس كان ليهم فى قلبى مكان
كنت بدى من غير حدود ولا عمرى حسبتها كام
وأرجع اخر اليوم لوحدى أضم جرحى وأنام
واللى شاف طيبتى سذاجه كان اول واحد خان
سابنى وسط الزحمه تايه وقلبى تعبان
يمكن وجعى علمنى إنى مش غلطان
والطيبه مش غباء دى أصل روح الإنسان
والخبث واللئم دى صفات الشيطان
ودمتم