إلى كل من طبع وللظلم يخضع
قالوا سلام
طب سلام
ع اللي نام
وع اللي دبح
في الحمام
و ع اللي مسحوب
م الودان
وع اللي شادد اللجام
واللي فارد في القلوع
وعاش يطبل للئام
اللي باعوا
واللي حلوا في الكلام
لجل مانام ع الدوام
واللي فاهم
إنه آمن أو تمام
طب سلام
بكره يخدوك
وانت مدفون كالنعام
ويستحلوا كل حاجة
حتى بيتك و المدام
لوفهمت إنك هتآمن
مكر ديب
وإنت أرنب ع الدوام
تبقى واهم
بكره هيشدوا اللجام
لما ييجي الدور عليك
ابقى نادي بالسلا م
بس لازم
تبقى فاكر
إن ده نفس الكلام
اللي طالب بيه جيرانك
وانت فاشل في العلام
لوفهمت ساعتها
إن نشجب أو نندد
كان غطاهم للي نام
وإن دي كلمة
ومخدر للجروح
مش للتئام
واللي صابك
من عمايلك
لما سلمت اللجام
للي فاكره
ف يوم حبيبك
لما ذوق في الكلام
فوق ويلا مد أيدك
للنايم فى الخيام
للي نفسه ف يوم يحس
هو أيه معنى السلام
السلام مش رمز
أو صورة حمام
السلام أمن وتسامح
مش مسكن ع الدوام
مش نطبطب
ع اللي سارق
أو ع الجبان
ويبقى بيننا الحق نام
السلام مش بيان
نشجب نندد
لما نلقى الظلم عام
فوق بحور الإنسانية
والحق ضاع
وسط الظلام
ده مش سلام
ده اسمه ضعف
واحنا بنذوق كلام
لما الطفولة تنتهك
ويتقتل بيننا الرضيع
ويا الغلام
ده مش سلام
لما الحراير
عرضهم ينتهك
وإحنا حاطين
فوق ضميرنا
ميت لجام
ده مش سلام
السلام لما اللي واخد
عهد منك بالأمان
جوه بيته
يعرف ينام
مش تبقى سارق
منه أرضه
ومستبيح حتى عرضه
وطارده نايم
في الخيام
وجاي تقول ده سلام
طب سلام
على اللي شاهد
واللي سارق
ع الدوام
واللي مسروق
منه حقه
وسط الزحام
واللي سارق منه حقه
مكبله بكلمة سلام
بقلم الشاعر/ فهمى محمود حجازى
