الغُــــــــــربه
بقلم / طلبه عبدالكريم الجازوى
الغُربة مش صحراء عادية…
دي صحراء بتـبلع الروح بالبُطِّيء.
تمشّي فيها ورجليك تتقل،
وقلبك يضرب في صدرك كإنه بيحارب آخر نفس.
الغُربة إنك تصحى الصبح وما تلاقيش صوت يناديك،
ولا وشّ يرتاح له قلبك…
تقوم لوحدك، وتاكل لوحدك، وتضحك لوحدك،
وتنام وإنت سايب دموعك تحت المخدة علشان محدّش يشوف ضعفك.
الغُربة إنك تبقى واقف وسط ناس كتير…
بس حاسس بمنتهى الوِحدة،
كإنك شبح بيمشي في دنيا مش بتاعته.
كلامهم مش كلامك،
ضحكتهم مش زي ضحكتك،
والأمل عندهم مش هو اللي قلبك بيدور عليه.
الغُربة نار…
بس نار من غير لهب.
تحرقك في الصمت،
وتوجعك من غير ما حد يحس.
تكتم صرختك، وتكمل…
علشان الحياة ما بتوقفش لحدّ.
الغُربة أقسى من البُعد…
الغُربة إنك تفقد نفسك وإنت لسه عايش.
تمشي وتدور على حد يفهمك،
وتلاقي كل اللي حواليك سراب…
والسراب مهما جريت له،
عمرك ما هتمسكه.
دي الغُربة…
كسر ما يتجبّرش،
وجرح ما يبانش
