اختار اللي يخاف ربنا
✍️ بقلم إيهاب نجاح جنديه
جريدة الأسبوع العربي الإخبارية
في زمن كثرت فيه الوجوه، وتكاثرت الكلمات الفارغة، صار صعب تفرق مين اللي يحبك بجد ومين اللي بيستغل وجودك. ساعات كتير نلاقي ناس تقول “بحبك” لكن الحقيقة أن الحب مش كلام، الحب أفعال، صمت، وأمان.
اللي يخاف ربنا فيك عمره ما هيظلمك، عمره ما يغشك، عمره ما يبيع سرك ولا يتخلى عنك وقت الشدة. قلبه بيكون صافي، وعقله واعي، وعمله دايمًا معك قبل كلامه. ده الحب الحقيقي… اللي يديك شعور بالأمان قبل أي وعد.
أما اللي قلبه ناقص، حبه ناقص… زي بيت مبني من غير أساس، يمكن شكله يلمع، يمكن كلامه يلمع، لكن أول ريح، أول موقف صعب… كله هيسقط. ومهما حاول، مش هيقدر يكون سند ليك. الحب من غير أصل مش أمان، مش حضن، مش دفء… مجرد وهم يضيع وقتك ومجهودك.
الحب الحقيقي هو اللي يخليك تحس إنك في أمان في حضنه، حتى من نفسك، حتى من جروحك القديمة. اللي يحبك بجد، هيحس إن وجودك نعمة، مش عبء. هيحميك من نفسك قبل ما تحس بالخطأ، ويحفظك من أي أذى يجيك من بره. لما تشوفه، هتحس إن الدنيا حواليك سكنت… وإنك لقيت اللي قلبه وطن وقلبه أرض واسعة تستوعب كل وجعك.
اختار اللي يعرف قيمتك، مش اللي يجي لما يكون محتاجك. اختار اللي يشاركك حزن الحياة قبل فرحها، اللي حضنه يبقى مكان تقدر تحكي فيه كل همومك، اللي كلماته مش بس كلام… أفعاله تثبت حبه قبل ما تسمع كلمة واحدة منه. ده اللي يستحق يسكن حياتك.
وفي لحظات الضيق… الدنيا بتكون صعبة، والناس حواليك بتختفي، بس اللي يخاف ربنا مش هيختفي. هيقف جنبك، هيشد إيدك، هيشيل عنك الحمل اللي متعود تحمله لوحدك. حتى لو الزمان جار، حتى لو الظروف صعبة… وجوده معاك هيفرق، حضنه هيدفي قلبك، وحنانه هيخلي وجعك يخف.
الحب الحقيقي مش مجرد مشاعر… الحب أمان، دعم، حضن ثابت، نظرة حنونة، كلمة صادقة، فعل قبل الكلام. اللي يخاف ربنا، هيشوفك مسؤولية في حياته، مش عبء. هيعرف قيمتك ويثبتلك كل يوم إنك أغلى من أي حاجة.
في النهاية، مش المهم تسمع “بحبك”، المهم تحس بالأمان… تحس إن فيه حد معاك حتى لو الدنيا ضديك… تحس إن فيه قلب صافي يحميك من كل شيء… تحس بالطمأنينة اللي مش أي كلمة تقدر تديها.
اللي يخاف ربنا فيك… ده اللي لازم تختاره، ده اللي يستحق قلبك وحياتك وكل لحظة فيها.
