الصمت مش ضعف… الصمت نجاة
بقلم: سيد جلال الفرماوي
في زمن بقى فيه الصوت العالي هو المقياس والكلام الكتير دليل القوة بقينا نظلم الصمت ونحسبه ضعف مع إنه في الحقيقة أوقات كتير بيبقى النجاة الوحيدة.
الصمت مش عجز عن الرد ولا خوف من المواجهة الصمت أحيانًا اختيار واعي اختيار إنك تحافظ على نفسك من استنزاف مالوش أي لازمة ومن معارك خاسرة نتيجتها معروفة قبل ما تبدأ.
في ناس بتفتكر إنك لو سكت تبقى مهزوم لكن الحقيقة إن في مواقف لو اتكلمت فيها تخسر احترامك لنفسك قبل أي حاجة تانية.
الصمت هنا مش انسحاب الصمت انسحاب ذكي.
مش كل حد يستاهل ردو ومش كل كلمة تتقال لازم نجاوب عليها.
في ناس بتتغذى على رد فعلك على عصبيتك على انفعالك. لما تسكت إنت بتقفل عليهم باب اللذة اللي مستنيينها.
الصمت كمان بيكشف.
اللي قدامك وهو بيتكلم لوحده من غير مقاطعة بيفضح نفسه بنفسه.
نواياه طريقته ضعفه كل ده بيبان لما إنت تختار إنك ما تدخلش اللعبة.
وفي أوقات تانية الصمت بيبقى رحمة.
رحمة بنفسك من إنك تقول كلام تندم عليه أو تحرق جسور لسه ممكن تحتاجها.
مش كل معركة تستاهل تتحارب ومش كل حق يتاخد بالصوت العالي.
الصمت مش معناه إنك سايب حقك الصمت أحيانًا تأجيل حكيم، لحد ما اللحظة الصح تيجي ولحد ما الكلمة تبقى في مكانها وبوزنها الحقيقي.
علّمنا نفسنا نرد بسرعة بس ما حدش علمنا إمتى نسكت.
ويمكن أعقل قرار تاخده في حياتك إنك تختار الصمت في الوقت اللي الكل فيه بيتخانق.
الصمت مش ضعف…
الصمت نجاة.
